«Будуць праблемы»: у Салігорску настаўніца змусіла школьніка выдаліць з сацсетак напісаны ім патрыятычны верш
«Нашай Ніве» стала вядома пра дзіўную сітуацыю, якая здарылася ў салігорскай гімназіі №1.
У гэтай гімназіі, у 10 «А» класе, вучыцца хлопец Герман Лебедзь.
Ён алімпіяднік па гісторыі, вучыцца добра — сярэдні бал вышэйшы за 8, пакрысе паўзе да дзевяці.
Адно з захапленняў школьніка — паэзія, ён і сам піша вершы.
На днях ён выклаў на сваю старонку УКантакце вось такі:
Бел-чырвона-белы сцяг
Дзе белы — незалежнасць
Стаю пад сцягам перамог
І чую прыналежнасць
Да поспехаў, да барацьбы
За чыстую свабоду
Няма цяпер яе ў нас
Вяртайце сцяг народу
Мы самі можам выбіраць
Пакіньце нас у спакоі
Мой — бел-чырвона-белы сцяг
Мой герб — гэта Пагоня.
Імаверна, верш быў прымеркаваны да 25 Сакавіка.
Што было далей, «Нашай Ніве» расказалі сябры сям'і і мама школьніка:
«Сыну пачалі пагражаць «праблемамі ў будучыні» і змусілі выдаліць гэта з сацсетак, калі ён гэтых «праблем» не хоча. Ён выдаліў. Здаецца, хлопец не вельмі пераймаецца, але спаў сёння кепска», — сказала нам мама Германа.
Паводле жанчыны, з ім правялі размову ў школе, а на наступны дзень у сям'ю чакаецца візіт са школы, бо ў іншых вершах хлопца ўгледзелі «суіцыдальныя ідэі».
Сам Герман пра сітуацыю гаварыць не хоча і лічыць, што яго класная — не асноўны рухавік сітуацыі, а што яна атрымлівае загады «вышэй».
У самой школе сітуацыю пакуль не каментуюць: «Цкавання школьніка няма, сітуацыя выглядае не так», — сказала «Нашай Ніве» намесніца дырэктара па выхаваўчай рабоце Валянціна Лянько.
З класнай кіраўніцай хлопца, Наталляй Арлукевіч, звязацца магчымасці няма, бо сёння ў Салігорску алімпіяды.
У профілі гэтай жанчыны на сайце школы паведамляецца, што яе педагагічны стаж 17 гадоў, яна выкладае рускую мову.
Яе крэда гучыць так:
«Голубь — это я.
Я — в творческом полете.
Творческий полет не ограничен гимназией.
Он — моя жизнь!»
Міністэрства адукацыі мае пракаментаваць сітуацыю найбліжэйшым часам.
Пракуратура пра смерць Мелказёрава: журналіст меў хранічную хваробу17
Каментары