У Дзярждуме абвясцілі перапынак для правядзення кансультацый з прэзідэнтам Расіі Уладзімірам Пуціным пасля таго, як дэпутат Валянціна Церашкова прапанавала змяніць Канстытуцыю так, каб даць кіраўніку краіны магчымасць узяць удзел у выбарах 2024 года, піша РБК.
Выступаючы на пасяджэнні Дзярждумы, Церашкова (член фракцыі «Адзіная Расія») заявіла, што ў той сітуацыі, у якой зараз апынулася Расія, існуюць «рызыкі непрадказальнасці» і «трэба прадугледзець надзейную страхоўку».
«І такой страхоўкай, я ўпэўненая на 100%, можа быць моцная прэзідэнцкая ўлада і маральны аўтарытэт лідара, які займае гэтую пасаду. Таму ўсе варыянты магчымых змяненняў, якія зараз абмяркоўваюцца ў грамадстве, гэта размовы пра Уладзіміра Уладзіміравіча Пуціна. І няма чаго тут хітраваць і мудраваць, людзей хвалюе і нават трывожыць, што будзе пасля 2024 года», — сказала Церашкова.
Дэпутат адзначыла, што Пуцін — гэта той чалавек, на якога людзі прывыклі разлічваць і спадзявацца, і выказала ўпэўненасць у тым, што гэта разумеюць усе дэпутаты Дзярждумы.
«Пытанне на самой справе не пра яго, а пра нас, грамадзян Расіі і іх будучыню. А калі так, то навошта круціць і мудраваць, навошта гарадзіць нейкія штучныя канструкцыі? Трэба ўсё сумленна, публічна, адкрыта прадугледзець. Ці ўвогуле прыбраць абмежаванне па колькасці прэзідэнцкіх тэрмінаў у Канстытуцыі, або, калі гэтага запатрабуе сітуацыя і калі гэтага захочуць людзі, закласці ў законе магчымасць для дзеючага прэзідэнта зноў абірацца на гэтую пасаду», — заявіла Церашкова.
Словы дэпутата былі сустрэтыя воплескамі. Скончыўшы пляскаць, старшыня Дзярждумы Вячаслаў Валодзін абвясціў перапынак у пасяджэнні для кансультацый. У тым ліку і з самім Уладзімірам Пуціным.
Пазней стала вядома, што Пуцін выехаў у Дзярждуму, дзе плануе выступіць а 15-й.
Цяпер чытаюць
Адданага ябацьку, які абражаў Святлану Ціханоўскую ў Threads, кінулі за краты14
Каментары