Сусветная харчовая праграма (World Food Programme — WFP) прагназуе маштабны голад з-за пандэміі новага каранавіруса SARS-CoV-2.
«Мы сур'ёзна б'ём трывогу. Мы асцерагаемся, што нас чакае па-сапраўднаму вялікі крызіс», — заявіла прадстаўніца берлінскага філіяла WFP Бетына Люшэр у інтэрв'ю інфармацыйнаму агенцтву epd, апублікаваным у пятніцу, 3 красавіка, піша dw.com.
Паводле яе слоў, ужо цяпер WFP аказвае неадкладную гуманітарную дапамогу 87 млн чалавек больш як у 80 краінах, пры гэтым праца гуманітарнай арганізацыі ўсё больш ускладняецца з-за войнаў, кліматычных змяненняў, засух і паводак; цяпер жа да гэтага дадалася і пандэмія каранавіруса.
«З-за каранавіруса, які пралез амаль ва ўсе афрыканскія краіны, у многіх рэгіёнах стварылася сапраўды цяжкая сітуацыя асабліва там, дзе слабая эканоміка і слабая сістэма аховы здароўя. Мы сутыкаемся з беспрэцэдэнтнай сітуацыяй, у якой мы як найбуйнейшая ў свеце гуманітарная арганізацыя не знаходзіліся яшчэ ніколі. Гэта абсалютна нязведаная тэрыторыя», — адзначыла Люшэр.
Паводле ацэнак ААН, ва ўсім свеце цяпер галадаюць больш за 820 млн чалавек. Толькі ва Усходняй Афрыцы недаядаюць 15 млн чалавек у такіх краінах, як Паўднёвы Судан, Эфіёпія, Самалі і Кенія.
«Пандэмія каранавіруса дае падставы баяцца, што голад стане рэальнасцю і для многіх мільёнаў іншых людзей. Патрэба ў неадкладнай харчовай дапамозе толькі вырасце», — канстатавала прадстаўнік берлінскага філіяла WFP.
Каментары