Аляксандр Лукашэнка не бачыць падстаў для пераносу рэспубліканскага суботніка, які мае прайсці 25 красавіка. Пра гэта кіраўнік дзяржавы заявіў сёння журналістам падчас наведвання бабруйскага прадпрыемства «Славянка», перадае БЕЛТА.
На думку кіраўніка краіны, цяпер няма падстаў для пераносу або адмены рэспубліканскага суботніка. Ён адзначыў, што людзі ўсё адно працуюць у пятніцу, і калі яны прыйдуць на працу ў суботу, то гэта ні на што не паўплывае.
«Таму, калі я прымаў гэтае рашэнне, я адназначна быў за суботнік. Тыя, хто працуюць, — яны адпрацуюць. Мы, чыноўнікі, вядома, сваю зарплату таксама пералічым у фонд суботніка, бо гэта святая справа», — сказаў Аляксандр Лукашэнка.
Сам кіраўнік дзяржавы плануе правесці суботнік у рэгіёне, пацярпелым ад аварыі на Чарнобыльскай АЭС. У гадавіну трагедыі ён заўсёды наведвае гэтыя раёны, а цяпер заадно застанецца і на суботнік. Разам з тым Лукашэнка адзначыў, што канкрэтны населены пункт яшчэ не абраны. «Я ў гэты час некалькі дзён буду жыць на поўдні, і там мы што-небудзь знойдзем. Які-небудзь лес пасадзім», — дадаў ён.
Сабраныя падчас рэспубліканскага суботніка грошы будуць накіраваныя на рамонт і мадэрнізацыю дзіцячых лагераў, акультурванне ваенных помнікаў, распавёў Аляксандр Лукашэнка. Ён растлумачыў, што прапаноўвалася гэтыя сродкі ўкласці ў сістэму аховы здароўя, але гэты кірунак будзе падтрыманы за кошт міжнароднай дапамогі.
Кіраўнік дзяржавы запэўніў: калі сітуацыя з каранавірусам абвострыцца і будуць неабходныя меры па ізаляцыі людзей, адмене масавых мерапрыемстваў, такія крокі абавязкова будуць прыняты. Пакуль у гэтым няма неабходнасці, падкрэсліў ён. «Калі ўсё будзе так, як цяпер, мы прарвемся», — упэўнены ён.
Цяпер чытаюць
Лукашэнка нервова пракаментаваў візіт Ціханоўскай у Кіеў38
Каментары