Новым сімвалам пратэсту ў Беларусі сталі тапкі ФОТЫ
На пікет кандыдатаў пратэсту ў Мінску некаторыя жыхары сталіцы прыйшлі з тапкамі і шлёпанцамі. На іх былі напісаныя антылукашэнкаўскія лозунгі.
Пікет сабраў тысячы людзей. Чарга ахвотных падпісацца за альтэрнатыўных кандыдатаў расцягнулася ад Камароўскага рынку да плошчы Якуба Коласа. Людзі былі ў абсалютнай большасці ў масках, але сацыяльная дыстанцыя не захоўвалася, бо людзей было зашмат.
Удзельнікі пікета скандавалі «Перамен!, «Жыве Беларусь» і, асабліва часта, «Стоп таракан! Но пасаран!» — лозунг, запушчаны ў Ютубе відэаблогерам Сяргеем Ціханоўскім.
Менавіта скандаваннем гэтага лозунгу сустракалі людзі Сяргея Ціханоўскага, яго таксама віталі апладысментамі.
Подпісы афіцыйна збірае Святлана Ціханоўская — жонка Сяргея. Калі яго арыштавалі на 15 сутак, каб не даць магчымасці падаць дакументы ў якасці кандыдата, сваю кандыдатуру вылучыла яна.
Акрамя Ціханоўскага і «кандыдатаў пратэсту» ад апазіцыі, на антылукашэнкаўскай платформе ў прэзідэнты пайшоў банкір і мецэнат Віктар Бабарыка. У яго ініцыятыўную групу сабраліся 9500 чалавек. Гэта рэкорд для альтэрнатыўнага кандыдата ў Беларусі.
Цяпер чытаюць
З'явілася яшчэ адно ФОТА Міколы Статкевіча пасля вызвалення2
Каментары