Сяляне з рэгіёна Уанкавеліка (Перу) ўзялі ў палон васьмярых работнікаў, якія рамантавалі антэну непадалёк ад іх пасёлка, піша bbc.com.
Сяляне памылкова вырашылі, што тыя ставяць вышкі мабільнай сувязі 5G.
Відавочна, яны з'яўляюцца прыхільнікамі канспіралагічных тэорый аб тым, што гэтая тэхналогія дапамагае пашыраць каранавірус.
Навукоўцы ўжо неаднаразова адмаўлялі такія сцвярджэнні.
«Ідэя аб тым, што 5G прыгнятае вашу імунную сістэму, не вытрымлівае крытыкі», — распавядаў доктар Сайман Кларк, прафесар клетачнай мікрабіялогіі ва Універсітэце Рэдынга.
Паводле яго слоў, хоць вельмі моцныя радыёхвалі могуць выклікаць павышэнне тэмпературы, 5G нават прыблізна не настолькі магутныя, каб нейкім чынам паўплываць на людзей.
Сяляне з Перу не выпускаюць палонных ужо некалькі дзён — пра гэта распавёў прадстаўнік кампаніі, у якой яны працуюць.
Перуанскія СМІ паведамляюць, што сяляне гатовыя вызваліць рабочых толькі пасля таго, як з іх мясцовасці прыбяруць антэны.
Нягледзячы на абвяржэнні навукоўцаў і іх заклікі не верыць у ілжывыя тэорыі, ідэя аб шкоднасці тэхналогіі 5G да гэтага часу карыстаецца папулярнасцю.
У розных краінах фіксуюць выпадкі падпалаў вежаў 5G, а ў інтэрнэце нават пачалі прадавацца прылады, якія «абараняюць» ад гэтай тэхналогіі.
Каментары