«Загад на адлічэнне студэнтаў супярэчыць заканадаўству». З БрДТУ звольнілася начальніца юраддзела
Тыдзень таму звольнілася юрысконсульт Брэсцкага дзяржаўнага тэхнічнага ўніверсітэта — жанчына не захацела падпісваць загад аб адлічэнні студэнтаў, бо ён супярэчыў заканадаўству.
А цяпер з працы сышла і яе начальніца Таццяна Крывушчанка, якая ўзначальвала юрыдычны аддзел БрДТУ.
«Я была ў адпачынку, мяне замяняла юрысконсульт, якая не захацела падпісваць загад аб адлічэнні студэнтаў. Яна кансультавалася са мною, я пацвердзіла — загад супярэчыць заканадаўству.
Калі я выйшла з адпачынку, адразу ў панядзелак раніцай мяне выклікаў рэктар Аляксандр Бахановіч. Сказаў тое ж, што і юрысконсульту: мы з вамі не спрацуемся. Размова была каля 30 хвілін, прысутнічаў «камітэтчык». Гэта мужчына, які цяпер будзе прарэктарам ці то па кадрах, ці то па бяспецы. Ён прысутнічае цяпер пры ўсіх размовах рэктара, — распавяла «Нашай Ніве» Таццяна Крывушчанка.
— Рэктар абвінаваціў мяне ў перавышэнні паўнамоцтваў, бо я пацвердзіла, што яго загад на адлічэнне студэнтаў быў нелегітымны. І папракаў мяне, што я кансультавала студэнтаў. Гэта праўда, я размаўляла з адным са студэнтаў, якога адлічылі.
Я доўга тлумачыла, чаму загад быў няправільны, што гэта мая праца і мая прамая функцыя — правяраць дакументы ВНУ, каб у іх не было памылак. Рэктар пагражаў: звальняйся па-добраму ці будзе горш. Я пасмяялася, спачатку сказала, што заяву пісаць не буду. Кажу: звальняйце па артыкуле, калі зможаце знайсці артыкул.
Пасля я напісала дакладную запіску, дзе распавяла ўсе абставіны, зарэгістравала яе. Паперу перадалі рэктару — і на наступны дзень я напісала заяву на звальненне па згодзе бакоў».
Крывушчанка працавала ў БрДТУ 15 гадоў.
«Пакуль не ведаю, што рабіць далей — крэдыты, растэрміноўкі, як ва ўсіх. Працу ў Брэсце знайсці няпроста, таму буду ўдзячная прапановам.
Але я не шкадую ні ў якім разе пра свой учынак. Лепш сядзець без працы, чым рабіць тое, што ад мяне патрабавалі», — кажа Таццяна.
Як рыхтаваўся візіт Ціханоўскай у Кіеў і чаму ён некалькі разоў пераносіўся12
Каментары