невыкананнем шэрагу палажэнняў антыкрызіснага плана сумесных дзеянняў з Расіяй
Прэм'ер-міністр Сяргей Сідорскі занепакоены невыкананнем шэрагу палажэнняў плана сумесных дзеянняў урадаў Беларусі і Расіі па пераадоленні наступстваў сусветнага фінансава-эканамічнага крызісу.
Пра гэта ён заявіў 19 мая на сустрэчы з дзяржсакратаром Саюзнай дзяржавы Паўлам Барадзіным напярэдадні запланаванага на 28 мая ў Мінску пасяджэння саюзнага Саўміна.
"На жаль эксперты пакуль не знаходзяць варыянты вырашэння тых даручэнняў, якія прэм'еры далі ў мінулы раз, падпісаўшы антыкрызісны план", — заявіў С.Сідорскі.
У прыватнасці, ён выказаў занепакоенасць абмежаваннем прамых паставак беларускай тэхнікі ў Расію.
"Рассельгасбанк" не крэдытуе беларускую тэхніку. Гэта значыць фактычна пастаўкі тэхнікі па прамых дагаворах абмежаваны. Я думаю, што гэта будзе прадметам нашых перамоў. Мы ўнеслі шэраг прапаноў па падтрымцы крэдытавання як у Беларусі, так і ў Расіі", — сказаў прэм'ер-міністр.
Ён зазначыў, што з-за ўплыву фінансавага крызісу тавараабарот паменшыўся на 40% і працягвае зніжацца.
"Пакуль не адчуваецца замацавання нашых дамоўленасцей на папярэднім саюзным Саўміне. Гэта выклікае занепакоенасць", — заявіў С.Сідорскі.
Кіраўнік беларускага ўрада падкрэсліў, што Беларусь "не прымае і не ўводзіць іншых абмежавальных мер, нават ва ўмовах фінансавага крызісу, і робіць усё, каб наш рынак быў максімальна адкрыты для тавараў з сумежных дзяржаў".
Паводле слоў С.Сідорскага, ёсць шэраг пытанняў, вырашэнне якіх беларускі бок хацеў бы актывізаваць. "На двары май, а мы дамаўляліся, што ў першым квартале гэтага года закончым працу па плане сумесных антыкрызісных мерапрыемстваў", — зазначыў прэм'ер-міністр.
Каментары