Лукашэнка пра некаторых рэлігійных дзеячаў: Асобныя кіраўнікі павялі сябе па-антыдзяржаўнаму. Зарэкамендавалі сябе не вельмі
У Беларусі неабходна захаваць міжрэлігійны і міжканфесійны мір. Пра гэта заявіў сёння Аляксандр Лукашэнка, назначаючы Аляксандра Румака новым упаўнаважаным па справах рэлігій і нацыянальнасцяў, піша БелТА.
«Вы бачыце, што адбываецца ў краіне. Будзем шчырыя, асобныя кіраўнікі павялі сябе, мякка кажучы, па-антыдзяржаўнаму. Кіраўніцтва. Я не бяру людзей, яны дачынення да гэтага не маюць. А менавіта, там некалькі чалавек зарэкамендавалі сябе не вельмі. Будзем лічыць, што памыліліся. Але вінаваціць іх і не бачыць сваіх праблем і недахопаў, напэўна, гэта не наш шлях. Таму вам трэба разабрацца, у чым мы, дзяржава, не дапрацавалі», - сказаў Лукашэнка.
Лукашэнка пры гэтым падкрэсліў, што трэба паважліва ставіцца да пачуццяў вернікаў. «І праваслаўныя, і каталікі — гэта нашы людзі, гэта адданыя людзі нашай дзяржаве. У тым ліку і каталікі, падкрэсліваю. Кожны выбраў сабе дарогу да храма. Таму да людзей трэба ставіцца з вялікай павагай і не парушаць рэлігійнае пачуццё чалавека. Як толькі мы ўмешваемся ў душу чалавечую, мы абавязкова паранім чалавека ў сэрца. З гэтага мы павінны зыходзіць. І самым жорсткім чынам спыняць ўсіх тых, хто разбурае мірнае стваральнае жыццё нашага народа і працуе на шкоду нашай дзяржаве. Іх не шмат, але мы іх павінны бачыць. У тым ліку і ў рэлігійным асяроддзі», — заявіў Аляксандр Лукашэнка.
Нагадаем, што 31 жніўня памежнікі не пусцілі назад у Беларусь кіраўніка беларускіх католікаў Тадэвуша Кандрусевіча, калі той вяртаўся з Польшчы. На наступны дзень Лукашэнка ў Баранавічах заявіў, што кіраўнік Каталіцкага касцёла нечакана выехаў для кансультацый у Варшаву і, атрымаўшы пэўныя задачы, вяртаўся ў Беларусь, таму трапіў у спіс неўязных, які агульны ў Беларусі і Расіі.
Неаднаразова крытыкаваў гвалт у Беларусі біскуп Юрый Касабуцкі, у прыватнасці дэмантаж мемарыяла Раману Бандарэнку. На гэта таксама звярнуў увагу Лукашэнка, а пракуратура дала біскупу папярэджванне. Атрымаў таксама папярэджванне і былы прэс-сакратар БПЦ а. Сергій Лепін.
На мінулым тыдні ў Беларусь прыязджаў спецпасланнік Папы Рымскага, былы апостальскі нунцый у Беларусі Клаўдыё Гуджэроці, які меў сустрэчу з Лукашэнкам.
Цяпер чытаюць
Што вядома пра экс-афіцэра Службы бяспекі Лукашэнкі Андрэя Спасава, якога пасадзілі за палітыку1
Каментары