Работнікі «Беларускага цэментнага завода» ў Касцюковічах выбралі свайго дэлегата, які будзе прадстаўляць іх інтарэсы на Усебеларускім народным сходзе. З гэтай нагоды яны нават запісалі відэазварот. На УНС паедзе гендырэктар завода Аляксандр Сапсалёў.
— Тое, што менавіта ён прадстаўляе наша прадпрыемства, узмацняе ўпэўненасць у тым, што мы будзем працаваць, развівацца, і ўпэўненасць у заўтрашнім дні нашай суверэннай Беларусі, — кажуць работнікі завода.
Пры гэтым замоўчваецца пра тое, што, напрыклад, у 2019 годзе ТАА «Беларускі цэментны завод» спрацаваў «у мінус» — страты прадпрыемства склалі 8,9 мільёна рублёў, паведамляе mogilev.online.
У мадэрнізацыю трох стратных цэментных заводаў, у тым ліку Касцюковіцкага, было прынята рашэнне ўкласці каля мільярда даляраў. Мадэрнізацыя ўсіх трох прадпрыемстваў з трэскам правалілася: яны працягваюць працаваць з вялікімі стратамі.
Пры гэтым на канец 2020 года ў Магілёўскай вобласці ўдзельная вага стратных прадпрыемстваў павялічылася з 16,1% да 20,5%, сума страты — у 7 разоў да 400,4 млн рублёў.
Каментары