Навукоўцы вырасцілі мышыны эмбрыён у прабірцы да стадыі сэрцабіцця
Ізраільскім навукоўцам удалося вырасціць эмбрыёны мышэй у лабараторных умовах да той стадыі, калі ў іх пачалі з’яўляцца канцавіны, развівацца крывяносная і нервовая сістэма і нават біцца сэрца.
Навукоўцы спрабуюць вырошчваць эмбрыёны сысуноў яшчэ з 1930-х гадоў. Мэта такіх эксперыментаў — больш дэталёва выявіць развіццё зародка, што немагчыма зрабіць ва ўлонні маці. Аднак такія даследаванні аднойчы могуць узняць пытанне, ці мае чалавек права вырошчваць жывёл «у прабірцы».
Да гэтага часу навукоўцам паспяхова ўдавалася вырошчваць эмбрыёны сысуноў, у тым ліку людзей, да стадыі імплантацыі, калі ў эмбрыёна пачынае фарміравацца плацэнта.
Аднак падтрымліваць такія эмбрыёны ўдавалася толькі на працягу 24 гадзін, пасля чаго, як правіла, эмбрыёны гінуць або ў іх пачынаюцца анамаліі развіцця, бо яны не могуць развівацца без улоння маці, піша The New York Times.
Ізраільскія навукоўцы з Інстытута Вейцмана ажыццявілі прарыў у гэтых эксперыментах. Даследчыкі выдалялі мышыныя эмбрыёны з самкі на пяты дзень яе цяжарнасці, а затым вырошчвалі іх на працягу шасці дзён у штучнай матцы.
Цяжарнасць мышы доўжыцца каля 20 дзён, таму на адзінаццаты дзень у эмбрыёна ўжо пачало біцца сэрца. Даследчыкам удалося вырасціць каля 1000 такіх эмбрыёнаў.
Пазней навукоўцы пачалі адразу браць аплодненыя яйцаклеткі, калі яны яшчэ не пачалі развівацца ва ўлонні самкі, і вырошчваць іх у штучных умовах на працягу 11 дзён.
На стварэнне штучнай маткі навукоўцам спатрэбілася каля 7 гадоў. Яна ўяўляе сабой сістэму з інкубатараў, пажыўных рэчываў і вентыляцыі.
Эмбрыёны размяшчаюць у шкляныя флаконы, якія знаходзяцца ўнутры інкубатараў, дзе яны плаваюць у адмысловай пажыўной вадкасці. Флаконы прымацоўваюць да кола, якое павольна круціцца, каб эмбрыёны не датыкаліся да сценак, бо ад гэтага яны змяняюць форму і паміраюць.
Інкубатары злучаюць з вентыляцыйнай сістэмай, якая падае эмбрыёнам кісларод і вуглякіслы газ, кантралюе іх канцэнтрацыю, а таксама ціск.
На адзінаццаты дзень навукоўцы параўналі штучна вырашчаныя эмбрыёны з тымі, якія развіваліся ў матках жывых мышэй. Лабараторныя эмбрыёны былі ідэнтычнымі з сапраўднымі.
Аднак на гэтай стадыі развіцця эмбрыёны становяцца завялікімі, каб выжыць без крывезабеспячэння, а пажыўнога раствору было ўжо недастаткова.
Пераадоленне гэтай перашкоды — наступная мэта навукоўцаў.
-
«Наступныя год-два вырашаць лёс чалавецтва». Інжынер, які звольніўся з Anthropic, расказаў, што думаюць унутры кампаніі
-
Штучны інтэлект рашыў задачу Наўе—Стокса, якую людзі не маглі разгадаць 90 гадоў. Гісторыя, аднак, абярнулася скандалам
-
Інжынер з Anthropic звольніўся, каб папярэдзіць, што ШІ вось-вось можа выйсці з-пад кантролю
Каментары