Палітвязень Вінярскі расказаў, якія БЧБ-торты згатавалі яны ў камеры на Дзень Волі
Instagram бы абзайздросціўся, але чаго няма, таго няма, жартуе вязень у лісце.
«…Нам удалося змайстраваць два торцікі ў колерах нацыянальнага сцяга, — напісаў Максім Вінярскі ў адным з лістоў на волю. — Выкарыстоўвалі для іх 2 камплекты бісквітных каржоў, набытых на «атаварцы», згушчанку, шакалад, масла. Для афармлення падышлі згушчанка і апрацаваны мармелад чырвонага адцення. І з выгляду, і на смак выйшла супер — Instagram бы абзайздросціўся, але чаго няма, таго няма…
Не праходзіць і дня, каб Вясна і свабода не станавіліся бліжэйшыя, — піша Вінярскі. — Можа, гэты шлях і будзе трохі даўжэйшы, чым хацелася б, але ўпэўнены, што вынік непазбежны…»
40-гадовы Максім Вінярскі быў затрыманы 22 студзеня — ён хаваўся ад сілавікоў даўжэй за іншых актывістаў «Еўрапейскай Беларусі», на якіх ішло паляванне. Яго абвінавачваюць па артыкуле 293 ч. 2 Крымінальнага кодэкса — Удзел у масавых беспарадках. Праваабаронцы лічаць абвінавачванне надуманым і палітычным і прызналі яго палітвязнем.
Гісторыя жыцця «мушкецёра рэвалюцыі» Максіма Вінярскага: не ўяўляў жыцця без Беларусі і адседзеў на сутках больш за паўтара года
Усяго ў Беларусі на сёння праваабаронцам вядомыя 1002 чалавекі, якія сталі фігурантамі палітычна матываваных крымінальных спраў, 325 з іх ужо прызнаныя палітычнымі зняволенымі. З моманту прэзідэнцкай кампаніі ў краіне адбылося больш за 34 тысячы палітычна матываваных затрыманняў. Такой хвалі рэпрэсій у Еўропе не было ад часу «дыктатуры чорных палкоўнікаў» у Грэцыі 1970-х.
Палітвязні на сёння сядзяць у двух дзясятках СІЗА, турмаў, ІК і хімій.
Каментары