Прэзыдэнт ЗША Джо Байдэн у сераду абвясьціў аб хуткім завяршэньні 20-гадовай прысутнасьці амэрыканскіх войскаў у Афганістане, піша «Радыё Свабода».
У сваёй прамове, зьмест якой перадаў тэлеканал CNN, ён заявіў:
«Мы ўвайшлі ў Афганістан пасьля жахлівага нападу, які адбыўся 20 гадоў таму. Гэта, аднак, не тлумачыць, чаму нам варта заставацца там у 2021 годзе. Я чацьвёрты амэрыканскі прэзыдэнт, які кіруе прысутнасьцю войскаў у Афганістане, і не зьбіраюся перадаваць гэтую адказнасьць пятаму. Час пакласьці канец самай працяглай вайне з усіх, што вяла Амэрыка. Пара амэрыканскім войскам вяртацца дадому».
Як чакаецца, апошні амэрыканскі вайсковец пакіне Афганістан да 11 верасьня — гадавіны тэракту ў Нью-Ёрку.
Генэральны сакратар NATO Енс Столтэнбэрг, які таксама выступіў у сераду, заявіў, што вайскоўцы іншых краінаў NATO, якія застаюцца ў Афганістане, таксама будуць выведзеныя з краіны на працягу некалькіх месяцаў.
У 2011 годзе колькасьць войскаў ЗША ў Афганістане перавышала 100 тысяч чалавек, тым часам як цяпер яна складае каля 2,5 тысяч. Агульная колькасьць прадстаўнікоў вайсковага кантынгенту краін NATO — менш за дзесяць тысяч.
Адміністрацыя папярэдніка Джо Байдэна Дональда Трампа пасля дасягненьня дамоўленасьцяў з афганскім радыкальным рухам «Талібан» прызначыла крайні тэрмін для вываду войскаў — 1 траўня. Каманда Байдэна вырашыла ўзяць адтэрміноўку, спасылаючыся на тое, што занадта рэзкае згортваньне вайсковай прысутнасьці паставіць пад пагрозу амэрыканскі і саюзны кантынгент. У амэрыканскай адміністрацыі паабяцалі даць талібам «рашучы адказ» у выпадку працягу агрэсіі супраць амэрыканскіх вайскоўцаў.
Злучаныя Штаты пачалі апэрацыю ў Афганістане неўзабаве пасьля тэрактаў 11 верасьня 2001 году — пасьля таго як талібы, якія кантралявалі тады большую частку тэрыторыі краіны, адмовіліся выдаць арганізатара тэрактаў Усаму бін Ладэна.
Каментары