Дзярждэп: Нармалізацыі адносін з Мінскам не будзе да заканчэння рэпрэсій
Злучаныя Штаты не маюць намеру весці з Беларуссю справы ў звычайным парадку, у тым ліку і ў дачыненні да вяртання свайго пасла ў Мінск, пакуль яе ўлады працягваюць парушаць правы чалавека.
Пра гэта паведаміў у сераду кіраўнік прэс-службы Дзярждэпартамента Нэд Прайс на рэгулярным брыфінгу для журналістаў, паведамляюць інфармагенцтвы.
«Нягледзячы на адкліканне амерыканскага пасла ў 2008 годзе, мы працягваем падтрымліваць дыпламатычныя адносіны з урадам Беларусі. Мы заўсёды спадзяваліся, што зможам ператварыць іх у больш нармальныя дыпламатычныя адносіны, што працягвае заставацца нашай мэтай. Пасол [ЗША] у Мінску мае жыццёва важнае значэнне для гэтых намаганняў. А магчымасць вярнуць пасла ў Мінск паслужыла б магутным сігналам, але пакуль у Беларусі працягваюцца парушэнні правоў чалавека, рэпрэсіі, не будзе звычайнага парадку вядзення спраў [з ЗША]», — сказаў дыпламат.
«Не можа быць звычайнага вядзення спраў, калі мы не ўбачым змены ў паводзінах з боку рэжыму Лукашэнкі ў Беларусі», — дадаў Прайс, адказваючы на пытанне аб вяртанні пасла.
Прызначаны пасол ЗША ў Мінску Джулі Фішэр, якая дагэтуль не атрымала беларускую візу, можа быць акрэдытаваная ў Вільні.
Цяпер чытаюць
«Мае спінагрызы са мной». Ціханоўская расказала, што ўжо выбірае для дзяцей школу ў Варшаве12
Каментары