Паглядзіце, як інавацыйная электронная скура будзе сачыць за вашым здароўем ВІДЭА
Магчыма, вельмі хутка дактары атрымаюць магчымасць сачыць за паказчыкамі здароўя пацыента праз электронную скуру на яго целе. Тэхналогія электроннай скуры зарадзілася толькі некалькі гадоў таму, але ўжо ў 2019 годзе гэтую індустрыю ацэньвалі ў 4,5 мільярды даляраў.
Усё пачалося ў канцы 2017 года, калі даследчыкі з Японіі распрацавалі вельмі тонкую і лёгкую электронную скуру. З дапамогай распылення вады яе можна прыляпляць на зону грудной клеткі і насіць на працягу тыдня. Аўтарам тэхналогіі з’яўляецца прафесар Такійскага ўніверсітэта Такао Самея, які ўжо пачаў перамовы з партнёрамі наконт масавай вытворчасці скуры. Пры гэтым новаму прадукту яшчэ трэба прайсці клінічныя іспыты, піша CNN.
Асновай электроннай скуры з’яўляецца гібкі матэрыял — полівінілавы спірт, які пакрываюць слоем золата. Скура можа фіксіраваць рытм сэрца і электрычныя імпульсы ад рухаў мускулаў. Невялікі перадатчык, прымацаваны да скуры, будзе перасылаць інфармацыю на смартфон ці ноўтбук, або ў воблачнае сховішча — каб яе мог прагледзець доктар.
Самея і яго каманда пачалі працу над электроннай скурай для робатаў яшчэ ў пачатку 2000-х гадоў. Дзве кампаніі карыстаюцца іх распрацоўкамі, каб перанесці электронную скуру ў іншыя сферы. Першая з іх — Xenoma, вытворца піжам і фітнэс-адзення з электроннай скурай у складзе. Другая кампанія, Signtle, распрацоўвае электронную скуру для выкарыстання ў медыцынскіх мэтах.
Прафесар Самея таксама працуе над спецыяльным светладыёдным дысплэем, створаным спецыяльна для старых людзей ці для тых, каму цяжка карыстацца смартфонам. На дысплэі будуць дэманстравацца паказчыкі рытму сэрца, прадстаўленыя ў форме вялікай і лёгкай для разумення графікі. Таксама сябры і родныя карыстальніка могуць дасылаць на дысплэй са свайго смартфона простыя смайлікі.
Каментары