Апазіцыйны палітык і былы дэпутат Дзярждумы РФ Дзмітрый Гудкоў паведаміў, што выехаў з Расіі ва Украіну і накіроўваецца ў Кіеў, піша ВВС.
Гудкоў праходзіць падазраваным па справе аб нявыплаце па дамове арэнды. Сам ён называе пераслед з боку расійскіх уладаў палітычным.
«Пад'язджаю да Кіева, дзе ў мяне даўно запланаваныя сустрэчы і эфіры (сёння — у Яўгена Кісялёва)», — напісаў Дзмітрый Гудкоў у сваім тэлеграм-канале.
«Некалькі блізкіх крыніц з атачэння Адміністрацыі прэзідэнта паведамілі, што калі я не пакіну краіну, фэйкавая крымінальная справа будзе працягнутая аж да майго арышту. Калі застануся, дадзеная санкцыя вырашыць пытанне Гудкова «любым спосабам», — паведаміў палітык.
Ён плануе дабрацца да балгарскай Варны, дзе знаходзяцца яго бацькі, а пра далейшыя планы раскажа пазней.
Гудкова і яго цётку затрымалі 1 чэрвеня, ім інкрымінуюць прычыненне маёмаснага ўрону ў выглядзе нявыплаты доўгу па дамове арэнды нежылога памяшкання.
Справа тычыцца фірмы бацькоў Гудкова, сваё дачыненне да яе палітык адмаўляе. Яго пратрымалі ў аддзяленні 48 гадзін, пасля чаго адпусцілі, не стаўшы абіраць меру стрымання.
Ён і яго цётка знаходзяцца ў статусе падазраваных.
Сума шкоды па справе аб нявыплаце арэнды перавышае мільён расійскіх рублёў (34 тысячы беларускіх). Такая шкода прызнаецца асабліва буйным памерам.
Пасля сыходу з Дзярждумы Дзмітрый Гудкоў стаў адным з найбольш прыкметных апазіцыйных палітыкаў у Маскве. У пачатку красавіка ён паведаміў, што зноў збіраецца ўзяць удзел у выбарах у ніжнюю палату парламента і вядзе перамовы аб вылучэнні ад партыі «Яблоко».
«Лічу, што высмактаная з пальца «справа аб падвале» была распачатая выключна, каб не дапусціць мяне на выбары і выціснуць з краіны як мінімум да дня галасавання. Спадзяюся, што з маім ад'ездам заўзятасць жандараў знізіцца», — пракаментаваў Гудкоў свой ад'езд з краіны.
Цяпер чытаюць
Лукашэнка: Пры цяперашнім цячэнні вайны Беларусь з Расіяй не змаглі б абараніць беларускай мяжы ад Украіны31
Каментары