У пачатку тыдня дыпламаты краін Еўрасаюза, ЗША, Японіі і Вялікабрытаніі былі запрошаны ў беларускае МЗС на сустрэчу з Уладзімірам Макеем. Што адбывалася на сустрэчы?
Як вядома «Нашай Ніве», нечаканасцяў не здарылася — абодва бакі чарговы раз пераагучылі свае пазіцыі.
Якімі былі асноўныя тэзісы Уладзіміра Макея?
Так, па яго меркаванні, масавага выхаду на вуліцы 25 сакавіка не адбылося праз жаданне беларусаў жыць у стабільнасці, і рэпрэсіі тут ні пры чым.
Асобна Макей прайшоўся па Арцёме Шрайбмане, маўляў, звярніце ўвагу, што ён выявіўся не такім аб'ектыўным і нейтральным, якім хацеў здавацца. Таксама дасталася Tut.by, які «пасля смерці Зісера перастаў быць нейтральным».
Дыпламаты пачулі крыўду на Святлану Ціханоўскую, пасля сустрэч з якой заходнія палітыкі выказваюцца аб гатоўнасці падтрымкі і пастражэння санкцый супраць Аляксандра Лукашэнкі. Маўляў, што яна, што Павел Латушка — насамрэч шкодныя для двухбаковых адносін, таму іх не трэба ўспрымаць усур'ёз. А беларусы, маўляў, не гатовыя жыць пад санкцыямі і не вераць у 10-мільярдную падтрымку ад міжнародных інстытуцый у выпадку змены ўлады.
Макей заклікаў не верыць у карцінку «паралельнай рэальнасці», якую нібыта ствараюць прыхільнікі перамен. І таксама расказаў замежным дыпламатам, што, па яго інфармацыі, краіны Захаду пагражаюць спыніць фінансаванне Латушкі, калі ў краіне не здарыцца масавых акцый пратэсту.
Таксама Макей раіў дыпламатам задумацца над думкамі, агучанымі Раманам Пратасевічам. Маўляў, яны неардынарныя і патрабуюць вывучэння і правільнай рэакцыі.
Вядома, што ў адказ на гэты спіч прадстаўнікі дыпмісій краін ЕС, Вялікабрытаніі, ЗША і Японіі выпусцілі сумесную заяву пасля сустрэчы.
Як вынікае з заявы, на сустрэчы дыпламаты заклікалі беларускія ўлады:
▫️спыніць пераслед актывістаў, незалежных СМІ і грамадзянскай супольнасці;
▫️спыніць адвольныя затрыманні, катаванні і бесчалавечнае абыходжанне ў дачыненні да мірных пратэстоўцаў і палітычных зняволеных;
▫️вызваліць і рэабілітаваць усіх палітвязняў і несправядліва затрыманых;
▫️расследаваць парушэнні правоў чалавека і прыцягнуць да суду тых, хто санкцыянаваў і здзяйсняў акты гвалту;
▫️пачаць інклюзіўны палітычны працэс, які б вёў да свабодных і справядлівых выбараў пад наглядам БДІПЧ АБСЕ.
Дыпламаты спадзяюцца, што ў Беларусь змогуць вярнуцца дыпламаты з Літвы, Польшчы, Латвіі, Вялікабрытаніі і ЗША.
Брат удавы Зельцара: Кадэбісты ішлі ў кватэру па мяне1
Каментары