Вязні паскардзіліся, што на хіміі ў Гомелі няма вады і святла — і начальства заварушылася
У «Нашу Ніву» са скаргай на ўмовы ўтрымання звярнуліся вязні гомельскай хіміі.
«Цягам доўгага часу ў выпраўленчай калоніі адкрытага тыпу №17 адбываецца капітальны рамонт. Людзі, якія тут адбываюць пакаранне, увесь гэты час сутыкаюцца з праблемамі, бо будаўнічая арганізацыя не варушыцца зусім ніяк.
У той момант, калі стаяла невыносная спёка, яны знялі пакрыццё даху. Але замест таго, каб займацца ім, пачалі займацца фасадам. А калі пачаліся дажджы, гэты адкрыты дах стаў працякаць і ліцца вадаспадам, затапліваючы калідоры і пакоі, у якіх жывуць людзі.
У выніку траплення вады ў праводку цяпер няма электрычнасці, лядоўні размарожваюцца. Пліты тут электрычныя, таму няма магчымасці гатаваць ежу. Адсутнічае гарачая вада. Нікога з прадстаўнікоў будаўнічай арганізацыі няма, і ніякіх захадаў па выпраўленні сітуацыі не робіцца», — напісаў нам вязень.
«Наша Ніва» звярнулася па каментар у прэс-службу МУС. Вольга Чамаданава запэўніла, што спачатку спраўдзіць інфармацыю.
Пасля гэтага яна дала наступны адказ: «На фота наступствы дажду, які прайшоў па ўсёй краіне ў папярэднія тры дні».
Разам з гэтым, па словах вязня, які даслаў інфармацыю, сёння ж начальнік выпраўленчай калоніі «максімальна прыклаў намаганні для хуткага аднаўлення даху, а таксама каб аднавіць падачу электрычнасці на кухні і ўключыць халадзільнікі. Таксама арганізавалі гарачае харчаванне — звадзілі людзей у сталовую». Гэта адбылося пасля абеду, бліжэй да 16-й гадзіны, што па часе супадае са зваротам у Міністэрства.
Да заўтра кіраўніцтва калоніі паабяцала падключыць электрычнасць у пакоях.
Цяпер чытаюць
Галіна Дзербыш казала пракурору: «Як памру, буду да ўсіх вас ноччу прыходзіць». І жыццё ўжо дагнала яе суддзю і сведак. Гісторыя пенсіянеркі, якой далі 20 гадоў калоніі13
Каментары