Лукашэнка ўнёс у парламент закон аб спыненні дамоўленасцяў па рэадмісіі з ЕС. Што будзе з коштамі на візы і з мігрантамі?
Лукашэнка ўнёс у парламент законапраект «Аб прыпыненні дзеяння пагаднення паміж Рэспублікай Беларусь і ЕС аб рэадмісіі асоб, якія знаходзяцца без дазволу». Гэтая дамова прымалася ў пакеце з дамовай аб зніжэнні коштаў на шэнгенскія візы для беларусаў. Пасля яе замарозкі незразумела, што будзе з візамі і з мігрантамі.
Паведамляецца, што дакумент падрыхтаваны ў рамках мер у адказ на «недружалюбныя дзеянні, прынятыя ЕС і яго дзяржавамі-сябрамі ў дачыненні да Беларусі».
Пагадненне вызначала механізм перадачы, прыняцця і вяртання асоб, якія парушылі ўмовы ўезду, знаходжання і пражывання. У найбліжэйшы час адпаведныя абавязацельствы афіцыйным Мінскам будуць замарожаныя. Паведамляецца, што такое прыпыненне Беларусь ажыццяўляе ў адпаведнасці з міжнародным правам.
Рэадмісія — гэта згода дзяржавы прыняць назад сваіх грамадзян або замежнікаў, якія знаходзіліся на тэрыторыі краіны, якія падлягаюць дэпартацыі з іншай дзяржавы.
***
Упершыню аб прыпыненні пагаднення было заяўлена ў канцы чэрвеня. Тады беларускае МЗС паведаміла аб тым, што пачынае рэалізацыю працэдуры прыпынення дзеяння пагаднення аб рэадмісіі з ЕС.
«Мы не можам выконваць свае абавязацельствы ў рамках гэтага пагаднення ва ўмовах уведзеных Еўрасаюзам санкцый і абмежаванняў <…>. Прыпыненне дзеяння пагаднення негатыўна адаб'ецца на ўзаемадзеянні з ЕС у сферы барацьбы з нелегальнай міграцыяй і арганізаванай злачыннасцю», — казалася ў паведамленні МЗС.
Варта зазначыць, што адно з наступстваў адмовы ад пагаднення — гэта магчымае падаражэнне шэнгенскай візы з 35 да 80 еўра, аднак, як каментавала ў канцы чэрвеня прэс-сакратар замежнапалітычнай службы ЕС Набіла Масралі, на кошт шэнгенскіх візаў, гэта не паўплывае:
«Рашэнне аб прыпыненні дзеяння пагаднення аб рэадмісіі не азначае аўтаматычнага прыпынення дзеяння пагаднення аб спрашчэнні візавага рэжыму паміж ЕС і Беларуссю ў адпаведнасці з артыкулам аб прыпыненні візавага рэжыму», — казала прэс-сакратар.
Загінуў беларускі добраахвотнік Васіль «Дзір» Рапіцкі11
Каментары