Пачаўся суд над гродзенскім блогерам Vadimati, ён адмовіўся даваць паказанні
Разгляд крымінальнай справы палітзняволенага Вадзіма Ермашука праходзіць у Шчучынскім раённым судзе.
Вадзіма Ермашука, вядомага як блогер Vadimati, абвінавачваюць у абразе Лукашэнкі (артыкул 368, пагражае да 4 гадоў калоніі) і ў абразе дзяржаўнага сцяга (артыкул 370, пагражае да 3 гадоў калоніі), піша «Радыё Свабода».
Падставай для завядзення спраў паслужылі два выказванні блогера.
Як расказала «Свабодзе» жанчына, якая прысутнічала на судзе над блогерам, паводле матэрыялаў справы, Вадзім Ермашук летась у жніўні і верасні нібыта публікаваў допісы ў сацыяльных сетках, у якіх абразіў Лукашэнку, напрыклад, подпісам пад фота «нелегітымны прэзідэнт». Яго вінавацяць паводле 368 артыкула Крымінальнага кодэкса Беларусі.
Другі артыкул, паводле якога Ермашуку выставілі абвінавачанне: «Абраза дзяржаўных сімвалаў Беларусі» (артыкул 370). Паводле матэрыялаў справы, 16 жніўня 2021 года Вадзім Ермашук на аўтазапраўцы ў Скідзелі ўзяў у рукі маленькі дзяржаўны сцяжок, які прадаваўся ў краме, і назваў яго «анучкай» дадаўшы, што «надта дорага каштуе кавалачак анучкі».
На судзе Вадзім Ермашук адмовіўся даваць паказанні. На пытанні суддзі не адказваў. Сваю віну не прызнаў ні па адным з артыкулаў.
Са словаў відавочцы, Вадзім трымаецца бадзёра. Таксама на судзе выступілі два супрацоўнікі Шчучынскага РАУС у якасці сведкаў па справе. З іх словаў, яны даведаліся, што ў той дзень ў Шчучын едзе блогер, які крытыкуе беларускую ўладу.
Вадзімаці адзначыў падчас суда, што ніколі не дзяліў беларусаў паводле прыхільнасці да сцягоў: дзяржаўнага або нацыянальнага. 17 снежня па справе Вадзіма Ермашука адбудуцца спрэчкі ў судзе Шчучынскага раёна.
Вадзіма затрымалі 16 жніўня падчас паездкі ў Шчучын, дзе ён збіраўся паглядзець пляцоўку для ролераў і скейтараў. Праз некаторы час яго асудзілі за «арганізацыю масавага мерапрыемства» і «хуліганскія дзеянні».
Пасля затрыманьня на яго завялі дзве крымінальныя справы — за «здзек з дзяржаўных сімвалаў» і «абразу прэзідэнта».
Пасля даносу Бондаравай раптоўна адмянілі выставу ў музеі Янкі Купалы. Цяпер яна патрабуе на музеі шыльды па-руску29
Каментары