Кінафармат «4х4»
Кінафармат «4х4»
Прапанова.
(Proposition)
Аўстралія–Вялікабрытанія, 2005, каляровы, 104 хв.
Жанр: вэстэрн, крымінальная драма.
ХІХ стагодзьдзе. Аўстралійская пустыня. Банда братоў Бэрнзаў не дае спакою маленькаму гарадку. Шэрыф Стэнлі прапануе Чарлзу Бэрнзу выбар: каб выратаваць ад шыбеніцы малодшага брата, ён мусіць застрэліць старшага…
Жорсткі й крывавы вэстэрн, экзыстэнцыйная аўстралійская драма з брытанскімі акторамі (Рычард Ўілсан, Гай Пірз).
Сцэнар да карціны Джона Гілката склаў яе кампазытар – Нік Кейв, слынны пясьняр рамантычных забойстваў.
Карціна – безумоўны дыямэнт у кінафармаце.
Куфар продкаў
Кыргызстан–Францыя–Расея–Нямеччына, 2005, каляровы, 104 хв.
Жанр: камэдыйная драма.
Пасьля стажыроўкі ў Парыжы Айдар вяртаецца ў родны аул зь нявестаю Ізабэль. Дзяўчына не разумее, чаму Айдар баіцца назваць усім яе як сваю нарачоную. А ў старым ауле, дзе за стагодзьдзі нічога не зьмянілася, рэй вядуць звычаі і старыя легенды. Каханьне Айдара і Ізабэль пад пагрозаю…
Аўтэнтычнае кіргіскае кіно.
Прыз Нурбэку Эгену за найлепшую замежную драму на кінафэсьце «Young Artists Awards 2006» у Лос-Анджэлесе.
Колькі ты кахаеш?
(Combien tu m’aimes?)
Францыя–Італія, 2005, каляровы, 95 хв.
Жанр: іранічная драма.
Франсуа пашэнціла ў лятарэі. Ён выйграў 2 міліёны эўра. Вязунчык адпраўляецца ў клюб, дзе шыкоўная італьянка гандлюе сваім целам. Франсуа прапануе прастытутцы быць зь ім, пакуль у яго ня скончацца грошы. Вось толькі ці спадабаецца гэта бандытам і сутэнэрам?
Тыповы сюжэт Бэртрана Бліе, хаця сёньня рэжысэр не на вяршыні посьпеху.
Аголеная Моніка Бэлючы ў ролі прастытуткі й Жэрар Дэпард’ё ў якасьці сутэнэра…
Кармэн з Каелічэ
(U-Carmen e-Khayelitsha)
Паўднёва-Афрыканская рэспубліка, 2005, каляровы, 120 хв.
Жанр: драма.
Паводле аповесьці Праспэра Мэрымэ й аднайменнай опэры Жоржа Бізэ.
Англічанін Марк Дорнфард-Мэй перанёс дзеяньне опэры Бізэ ў найбяднейшы раён Кейптаўну – Каэлічэ. Опэра адмыслова была перакладзеная на мову афрыканскага племені коса, і ўсе акторы – чарнаскурыя.
Першы фільм з Паўднёыва-Афрыканскай рэспублікі на беларускіх экранах.
Галоўны прыз «Залаты мядзьведзь» Бэрлінскага кінафэсту.
❏
Фільмы кінафармату «4х4» дэманструюцца ў менскіх кінатэатрах «Перамога», «Аўрора», «Мір», «Цэнтральны» з 20 па 23 ліпеня.
Цяпер чытаюць
«Соевыя экстрэмісты павінны адпрацаваць міску клубніц». Скардзіўся на ўмовы працы ў КДБ, а цяпер уцюхвае трэнінгі сілавікам — хто такі Антон Шабуневіч1919
Каментары