З’явілася фота журналісткі пула Лукашэнкі на «Маршы за свабоду». Яна працягвае працу: «Са мной нічога не здарыцца»
Фотаздымак з марша каля стэлы 16 жніўня 2020 года выклала былая калега ў адказ на брыдкае відэа БТ. Але да чаго там Вольга Забеліч, журналістка канала «Мір»? Разбіраемся.
Экс-рэпарцёрка АНТ Наталля Казей нядаўна дала інтэрв’ю «Белсату», у якім яна расказала пра працу на тэлеканале «Мір» і выпадкі харасмента падчас яе.
Пасля чаго пра Казей выйшаў сюжэт на «Беларусь 1»: згадалі яе аповед пра выкідыш у 2020 і заявілі, што Казей хлусіць, маўляў, яна медыкаментозна спыніла цяжарнасць. Нават апублікавалі медыцынскі дакумент (што парушае закон, бо разгалошвае медыцынскую таямніцу).
Пасля чаго Казей апублікавала ў фэйсбуку фота сваёй — ужо былой — калегі і сяброўкі Вольгі Забеліч, журналісткі тэлеканала «Мір». На фота Вольга з букетам кветак на тым самым «Маршы за свабоду», які прайшоў 16 жніўня 2020 года і быў самым масавым у беларускай гісторыі.
Вось тое фота:
Пікантнасць сітуацыі ў тым, што Забеліч працягвае працаваць на «Міры». І працягвае здымаць прапагандысцкія сюжэты.
Вось яе апошнія творы: «Бясплатная адукацыя і медыцына: Лукашэнка вызначыў курс на сацыяльную арыентацыю», «Лукашэнка заклікаў вывесці эканоміку на шлях ўстойлівага інавацыйнага развіцця», «Нараджэнне новага жыцця: Лукашэнка наведаў цэнтр «Маці і дзіця».
Але ж Забеліч не мае ніякага дачынення да сюжэта на БТ. Для чаго Наталля Казей выклала яе фотаздымак з марша? Тым больш, што сёння такога здымка дастаткова, каб на чалавека завялі крыміналку і адправілі на «хімію» ці нават у калонію.
Наталля Казей: «Здымак я выклала, каб паказаць факты, што ў сістэме працуюць людзі, якія супраць самой сістэмы»
«Зараз вялікая колькасць маіх сяброў, калег, сядзяць у турме за сваю праўду, — патлумачыла Наталля Казей «Нашай Ніве». — Напрыклад Ксенія Луцкіна, якая раней працавала на БТ. У той жа час людзі, якія засталіся працаваць у дзяржСМІ — на БТ, СТВ, «Мір» — таксама супраць Лукашэнкі. І гэта я ведаю не з нейкіх там плётак, гэтыя людзі казалі тое самі.
Яны абяцалі звольніцца, хадзілі на маршы, расказвалі, як ненавідзяць Лукашэнку і хочуць сумленных выбараў… Але зараз яны працягваюць дапамагаць уладзе, якую самі ненавідзяць. Большасць работнікаў дзяржаўных СМІ проста граюць ролю, яны не вераць у тое, што самі кажуць. На маршах я сустракала шмат калег, якія казалі: «Мы таксама звольнімся!»
Але ім пасля прапанавалі кватэры — нам з мужам таксама прапаноўвалі, каб мы не звальняліся — і яны зрабілі свой выбар. І працягваюць рабіць гэтыя брудныя сюжэты.
За кожнае слова ў маім інтэрв’ю «Белсат» я адказваю галавою. І пра дамагальніцтвы, і пра мой выкідыш.
Хоць мне цяжка, але я растлумачу пра тое спыненне цяжарнасці. Калі адбываецца выкідыш, часам не да канца ўсё выходзіць. Тады жанчыне мусяць рабіць чыстку ці прызначаць медыкаменты, каб арганізм сам пазбавіўся.
12 жніўня я трапіла ў бальніцу і доктар мне сказаў: «Дзіця згубілі, але ў вас не да канца выйшла ўсё. Трэба ці чысціць ці ўжыць медыкаменты». І было вырашана прыняць таблеткі, бо чыстка — горш, можа паўплываць у будучым на магчымасць мець дзяцей.
Пра фота і Вольгу Забеліч. 16 жніўня я адпрасілася ў дактароў, каб пайсці на марш. Вольга заехала за мною і мы разам паехалі туды. Яна ўсё выдатна ведае, чаму я была ў бальніцы, што адбывалася — і цяпер яна маўчыць.
Маўчаць — гэта яе права. Але і гаварыць — маё права.
Здымак я выклала, каб паказаць факты, што ў сістэме працуюць людзі, якія супраць самой сістэмы. Зараз дзяржава намагаецца пераканаць, што ўсе за Лукашэнку, а тыя, хто з’ехаў — здраднікі, «беглыя» і хлусы. Але ж не. Мы былі вымушаныя з’ехаць і мы не хлусы, за свае словы мы можам адказаць. А хлусіце вы, бо спачатку выходзіце на маршы, зрываючы галасы ў крыку «Жыве Беларусь!», а пасля кажаце ў сваіх сюжэтах які Лукашэнка выдатны.
Ці буду я адчуваць віну, калі ў Вольгі Забеліч будуць праблемы? А чаму я мушу адчуваць віну? Бо яна хадзіла на марш? Дык ці я ў гэтым вінаватая?
За тое, што сістэма можа яе пасадзіць у турму? Дык сядзіць агромністая колькасць людзей, якія былі на маршах. І хто мусіць адчуваць віну за гэта?
Я не хачу, каб Забеліч сядзела ў турме. Зла ёй не жадаю. Але, мяркую, калі яна два гады выкручвалася і падманвала сістэму, то і зараз выкруціцца».
Вольга Забеліч: «Са мной абсалютна нічога не здарылася. І не здарыцца»
«Наша Ніва» звязалася з Вольгай Забеліч, каб пацікавіцца, ці не ўзніклі ў яе праблемы пасля публікацыі фота з Марша.
«Са мной абсалютна нічога не здарылася. І не здарыцца. Калі здарыцца, тады і пагаворым», — адказала журналістка.
Але адказваць, як ужываюцца паходы на маршы і праца ў лукашэнкаўскім пуле, Вольга Забеліч не захацела:
«Я не буду нічога каментаваць, пагаварыце на гэтую тэму з Наталляй Казей. Але ўсё, што яна вам скажа, будзе поўнай лухтой».
Чытайце таксама: Намеснік гендырэктара БЕЛТА па ідэалогіі знік з радараў у верасні, а знайшоўся ў судзе. Падрабязнасці
Чаму хобіты жывуць у беларускіх вёсках, а эльфы гавораць старабеларускай. Перакладчык «Валадара Пярсцёнкаў» адказвае на ўсе пытанні1
Каментары