9 лютага адзначаецца Дзень салідарнасці з Беларуссю. Напярэдадні, 8 лютага, у Вільні амбасадары і спецыяльныя прадстаўнікі Літвы, Польшчы, Францыі, ЗША, Еўрасаюза сустрэліся з прадстаўнікамі беларускіх няўрадавых арганізацый (Праваабарончы цэнтар «Вясна», Беларускі дом правоў чалавека, Беларускі Хельсінкскі камітэт, Беларуская асацыяцыя журналістаў, Фонд салідарнасці BYSOL) і абмеркавалі сітуацыю з правамі чалавека ў Беларусі, піша «Радыё Свабода».
Амбасадары Еўрасаюза, Літвы, Францыі, Польшчы і ЗША напярэдадні Дня салідарнасці з Беларуссю выказалі сваю падтрымку беларусам, якія, нягледзячы на рэпрэсіі рэжыму, працягваюць адстойваць свае правы.
Паводле ўдзельніка сустрэчы Андрэя Стрыжака, былі абмеркаваныя «кірункі, у якіх Еўрасаюз і ЗША могуць і будуць працягваць дапамогу беларусам».
«Гэта не значыць, што нехта прыйдзе і павырашае ўсе нашы праблемы, гэта наша з вамі задача, але сёння асабліва важнае разуменне, што мы не адны. І мы не адны працуем далей», — заявіў Стрыжак.
Святлана Ціханоўская заклікала 9 лютага ва ўсім свеце падтрымаць незалежныя медыя Беларусі і журналістаў у Міжнародны дзень салідарнасці з Беларуссю.
Беларуская асацыяцыя журналістаў напярэдадні Міжнароднага дня салідарнасці зь Беларуссю падрыхтавала парады, як можна дапамагчы рэдакцыям і журналістам. Ёсць тры асноўныя рэкамендацыі:
- дасылаць лісты, тэлеграмы і грашовыя пераводы палітзняволеным, сярод якіх 33 прадстаўнікі СМІ;
- падпісвацца, дзяліцца навінамі і камунікаваць з рэдакцыямі;
- падтрымаць рэдакцыі альбо журналістаў фінансава.
Каментары