Венецыянская камісія моцна раскрытыкавала праект Лукашэнкавай Канстытуцыі
Венецыянская камісія лічыць, што прапанаваныя папраўкі ў Канстытуцыю Беларусі не ліквідуюць наяўнага моцнага дысбалансу галін улады, а могуць нават узмацніць яго. Пра гэта гаворыцца ў тэрміновым папярэднім меркаванні камісіі.
Камісія таксама крытыкуе недастатковую працу парламента пры распрацоўцы зменаў у Канстытуцыю, непразрыстасць працэсу распрацоўкі паправак, адсутнасць супрацоўніцтва паміж уладамі і грамадзянскай супольнасцю і апазіцыяй, вымушанай пакінуць краіну.
Камісія лічыць, што ў такіх выпадках рэферэндум ператвараецца ў плебісцыт і выкарыстоўваецца як сродак легітымізацыі аўтарытарных тэндэнцый. Адзначаецца, што папраўкі дазваляюць прэзідэнту і далей канцэнтраваць уладу ў сваіх руках і нават яшчэ больш узмацніць сваё становішча.
«Венецыянская камісія лічыць, што праект паправак, прапанаваны на рэферэндум 27 лютага 2022 года, не выпраўляе моцны дысбаланс галін улады, які існуе пры дзейнай Канстытуцыі, і можа нават пагоршыць яго.
Хоць прапанаваныя інстытуцыйныя змены варта ў цэлым ацэньваць негатыўна, гэта не значыць, што канстытуцыйная рэформа ў Беларусі не патрэбная або непажаданая. Наадварот, Венецыянская камісія запрашае ўлады правесці канстытуцыйную рэформу, якая выправіць наяўны дысбаланс галін улады і прапануе прымальную сістэму стрымак і процівагаў, у тым ліку з захаваннем працэдуры змены Канстытуцыі ў адпаведнасці з міжнароднымі стандартамі», — даюць заключэнне эксперты.
Венецыянская камісія — кансультатыўны орган па канстытуцыйным праве пры Савеце Еўропы. Эксперты Камісіі аналізуюць законы і законапраекты дзяржаў-удзельніц, якія закранаюць праблемы канстытуцыйнага права. Беларусь — асацыяваны член Камісіі.
Каментары