У зоне баявых дзеянняў пад Кіевам знік украінскі журналіст і дакументаліст Макс Левін
Апошні раз Макс Левін выходзіў на сувязь 13 сакавіка ў Вышгарадскім раёне пад Кіевам. Там, дзе ён павінен быў працаваць, адбываліся інтэнсіўныя баявыя дзеянні, падчас якіх ён мог атрымаць раненне або трапіць у палон да расійскіх вайскоўцаў, паведамляе Радыё Свабода.
Макс Левін нарадзіўся ў 1981 годзе на Кіеўшчыне. Працуе як фотакарэспандэнт і дакументальны фатограф ды аператар шматлікіх украінскіх і міжнародных выданняў, супрацоўнічаў з агенцтвамі Reuters, BBC, TRT World, Associated Press, LB.ua, Hromadske.
Ягоныя фотаздымкі публікавалі многія аўтарытэтныя ў свеце выданні.
Журналісты падчас расійскай вайны ва Украіне часта працуюць пад пастаяннай пагрозай абстрэлаў і палону.
Украінская грамадская арганізацыя «Інстытут масавай інфармацыі» ад пачатку агрэсіі Расіі супраць Украіны збірае факты злачынстваў расійскага войска супраць журналістаў. На 22 сакавіка зарэгістравана больш за 100 такіх фактаў.
Каментары