Пра намер паставіць Украіне цяжкую зброю напісаў прэм'ер-міністр Нідэрландаў Марк Рутэ па выніках размовы з Уладзімірам Зяленскім. А Румынія спецыяльна пад перадачу зброі са сваіх запасаў мяняе нацыянальнае заканадаўства.
«Падчас размовы з Уладзімірам Зяленскім міністр абароны і я выказалі нашу падтрымку Украіне ў сувязі з пачаткам новага наступлення Расіі. Нідэрланды будуць пастаўляць Украіне больш цяжкую тэхніку, у тым ліку бранятэхніку. Разам з саюзнікамі мы разглядаем магчымасць пастаўкі дадатковай цяжкай тэхнікі», — напісаў Марк Рутэ ў Твітары.
Таксама стала вядома, што ўзбраенне з рэзерваў некаторых устаноў сістэмы нацыянальнай абароны збіраецца перадаць Украіне Румынія. Пра гэта піша румынская газэта Romanialibera.
Гэта рашэнне стане магчымым дзякуючы унесеным папраўкам у румынскае заканадаўства. Для гэтага Мінабароны краіны распрацавала надзвычайную пастанову. У тэксце яе праекта наўпрост адзначана, што яна неабходная ў кантэксце ваеннага ўварвання Расіі ва Украіну.
Сёння заканадаўства Румыніі не дазваляе ёй перадаваць зброю з вайсковых рэзерваў краінам, якія не з'яўляюцца членамі НАТА. Акурат гэта зменамі ў заканадаўстве хочуць выправіць.
Як піша газета, хутчэй за ўсё Украіне прапануюць зброю вытворчасці былога СССР, якой украінскія вайскоўцы выдатна ўмеюць карыстацца.
Цяпер чытаюць
«Або мы цябе згвалцім, або ты паголіш бараду разам з галавой». Лахвіч расказаў, што з ім адбылося13
Каментары