У дзень сустрэчы з Мядзведзевым у Сочы Лукашэнка распавядае ў «Известиях», як круцілі лічбамі галасавання ў 2006 годзе. Піша ў сваім блогу на НН Аляксандр Класкоўскі.
У дзень сустрэчы беларускага кіраўніка з расійскім у Сочы «Известия» стрэлілі загалоўкам «Лукашэнка: мае выбары былі сфальсіфікаваныя».
Маскоўская газета надрукавала інтэрв’ю, якое 13 жніўня браў Міхаіл Гусман (памятаеце, ён тады яшчэ касіў траву з гаспадаром у Драздах?).
Нагадаю: бомба пра фальсіфікацыю выбухнула ўвосень 2006 года, калі Лукашэнка гутарыў з украінскімі журналістамі. Пастфактум людзі з ягонага атачэння доўга даводзілі: прэзідэнта не так зразумелі… Пакрысе тая заява стала забывацца.
Зараз Лукашэнка пацвярджае:
«За мяне на апошніх выбарах прагаласавала, дзеля ведама, 93%. И я прызнаўся потым, калі мяне проста пачалі душыць, што мы сфальшавалі выбары. І я груба сказаў: «Так, сфальшавалі». Я аддаў каманду, каб не 93% было, а недзе там 80, я не памятаю колькі. Таму што за 90 — гэта ўжо псіхалагічна не ўспрымаецца. Але гэта была праўда».
Нязменны прэзідэнт Беларусі эфектным пасажам хацеў падкрэсліць, як яго любіць народ. Бачыце, маўляў, сціпласць прымушае нават трохі збіваць лічбы, каб не нагадвалі статыстыку колішніх рэферэндумаў у Садама Хусейна.
Каму аддавалася каманда, як выглядала працэдура пераробкі вынікаў — гэтыя дэталі не расшыфроўваюцца. Але гэта менавіта дэталі. А так — з першых вуснаў прагучала пераканаўчае тлумачэнне для тых, хто яшчэ думае, што ў Беларусі ёсць нейкія выбары.
Гэтае прызнанне наўрад ці здзівіць расійскую публіку: там палітыка таксама робіцца «па паняціям». Але ж бравада пэўна разлічана на тое, што яе пракаўтнуць як айчынны электарат, так і Еўропа.
Каментары