«Адзінае рашэнне — неадкладная капітуляцыя ўкраінскіх уладаў». Дэпутат Савіных выступіў з заявай
Старшыня Пастаяннай камісіі Палаты прадстаўнікоў па міжнародных справах Андрэй Савіных узяў удзел у анлайн-пасяджэнні Парламенцкай асамблеі АБСЕ, прысвечаным ролі арганізацыі ва ўрэгуляванні канфлікту ва Украіне і яго наступстваў.
Савіных абвінаваціў краіны НАТА ў перадачы Украіне ўзбраення, разведвальнай інфармацыі і допуску сваіх грамадзян для ўдзелу ў ваенным канфлікце на баку Украіны. Гэта, на думку дэпутата, «прыносіць дадатковыя пакуты простым грамадзянам Украіны».
«Складваецца ўражанне, што адзіным рашэннем узброенага канфлікту на Украіне можа стаць толькі неадкладная капітуляцыя ўкраінскіх уладаў», — сказаў Савіных.
На яго думку, гэты крок дазволіць Расіі правесці дэнацыфікацыю Украіны, аказаць дапамогу ў правядзенні новых выбараў, для назірання за якімі будзе запрошаная і ПА АБСЕ, і іншыя міжнародныя назіральнікі.
«Гэта шлях стварэння суверэннай Украіны, свабоднай ад ціску замежных цэнтраў, свабоднай ад дыктату экстрэмісцкіх і алігархічных структур, якія фінансуюцца знешнімі сіламі за кошт рабавання ўкраінскага народа», — заявіў Савіных.
Таксама ён заявіў, што «пасля капітуляцыі» пытанне аднаўлення Украіны будзе вырашанае за кошт заходніх дзяржаў, якія пастаўлялі Украіне ўзбраенне.
Законнасць нападу на суверэнную дзяржаву і факты выкаранення ўсяго ўкраінскага на акупаваных тэрыторыях Савіных праігнараваў.
Цяпер чытаюць
Масавыя арышты афіцэраў прайшлі на авіябазе ў Мачулішчах — абвінавачваюць у сувязях з апазіцыяй37
Каментары