Bloomberg: «Аэрафлоту» з-за дэфіцыту запчастак праз тры месяцы давядзецца пачаць разбіраць свае самалёты
Авіякампанія «Аэрафлот» найбліжэйшым часам праз санкцыі сутыкнецца з недахопам запчастак для сваіх самалётаў Boeing і Airbus, піша Bloomberg.
Паводле ацэнак экспертаў кампаніі IBA, якая спецыялізуецца на бізнэс-аналітыцы ў галіне авіяцыі, каб падтрымліваць свой флот у працаздольным стане «Аэрафлоту» праз тры месяцы давядзецца пачаць разбіраць частку самалётаў на запчасткі. Замяніць прадукцыю Boeing і Airbus расійскімі самалётамі як мінімум у найбліжэйшы час не атрымаецца.
Bloomberg таксама адзначае, што вайна паклала канец амбіцыйным планам расійскай авіякампаніі, у якой быў адзін з самых новых паркаў самалётаў у свеце. Праз санкцыі «Аэрафлот» не толькі пазбавіўся доступу да запчастак для сваіх самалётаў, але і быў вымушаны рэзка скараціць замежную маршрутную сетку.
На пачатак расійскага ўварвання ва Украіну «Аэрафлот» выконваў палёты ў 56 краін, піша Bloomberg, а на сярэдзіну мая лётаў толькі ў 13. Пасажырапаток авіякампаніі рэзка ўпаў.
«У агляднай будучыні «Аэрафлот» будзе па большай частцы авіякампаніяй, якая працуе на ўнутраным рынку», — лічыць Арнольд Барнэт, эксперт па бяспецы палётаў у Школе менеджменту Слоўна пры Масачусецкім тэхналагічным інстытуце.
Каментары