У правядзенні выпускных экзаменаў у школах у гэтым годзе нічога не змяняецца, а выпускныя вечары ўсё гэтак жа забаронена праводзіць дзе-небудзь, акрамя школ, пры гэтым яны не абыдуцца без напамінаў пра Год гістарычнай памяці.
На прэс-канферэнцыі ў панядзелак прадстаўнікі Міністэрства адукацыі распавялі пра тое, калі і як пройдуць апошнія званкі, экзамены і выпускныя ў Беларусі, піша Zerkalo.io.
Апошні званок
Ва ўсіх школах краіны ён прызначаны на панядзелак, 30 мая. Пры гэтым 27 мая ў Маладзечне пройдзе Рэспубліканскі апошні званок, на які збяруць 1,5 тысячы юнакоў і дзяўчат з усіх рэгіёнаў. Выпускнікі пройдуць калонай па горадзе, ускладуць кветкі да манумента Перамогі, затым у Лядовым палацы адбудзецца цырымонія ўзнагароджання найлепшых выпускнікоў і «моладзевая дыскатэка з удзелам папулярных выканаўцаў», расказала кансультант упраўлення сацыяльнай, выхаваўчай і ідэалагічнай работы міністэрства адукацыі Ларыса Емяльянчык.
Выпускныя іспыты
Сёлета і форма правядзення іспытаў, і іх спіс яшчэ застаюцца такімі ж, як раней. Пройдуць яны з 1 па 9 чэрвеня.
Дзевяцікласнікі будуць здаваць рускую і беларускую мовы ў форме дыктоўкі (працягласць экзамену — гадзіна) і кантрольную працу па матэматыцы (працягласць — чатыры гадзіны). Экзамены пройдуць 2, 7 і 9 чэрвеня.
Адзінаццацікласнікі здаюць чатыры экзамены: гэта беларуская ці руская мова (па выбары) у форме пераказу, кантрольная работа па матэматыцы, вусныя экзамены па гісторыі Беларусі і замежнай мове. На пераказ даецца чатыры гадзіны, на кантрольную — пяць, на падрыхтоўку адказу па білеце — 30 хвілін. Пісьмовыя экзамены будуць праходзіць 1, 3 альбо 6 чэрвеня.
Як і раней, заданні пісьмовых экзаменаў абвесцяць па тэлебачанні. У адзін дзень можа быць толькі адзін іспыт.
Выпускныя вечары
Яны прызначаныя ва ўсёй краіне на адзін дзень — 10 чэрвеня. Праводзіць святкаванне, паведаміла Ларыса Емяльянчык, па-ранейшаму можна толькі ва ўстановах адукацыі, у выключных выпадках — ва ўстановах дадатковай адукацыі дзяцей і моладзі або ўстановах культуры. У названых рамках час і месца правядзення свята вызначае кіраўніцтва школы з бацькоўскім камітэтам па ўзгадненні з мясцовымі выканкамамі.
— Мы не вітаем правядзенне школьнага мерапрыемства дзе-небудзь у рэстаране, аграсядзібе і іншых месцах. Загадам выразна сказана аб месцы правядзення выпускнога вечара. Гэтая ўстанова адукацыі, — падкрэсліла кансультант Міністэрства.
Гаворка ідзе пра сакавіцкі загад ведамства, дзе ўжо прапісаныя ўсе пытанні правядзення выпускных.
— Рэгламентаваны і змест сцэнарыяў выпускных вечароў, апошняга званка, якія павінны ў абавязковым парадку ўключаць і мерапрыемствы, прысвечаныя году гістарычнай памяці, — распавяла Емяльянчык.
У дзень апошніх званкоў і выпускных вечароў практычна ва ўсіх рэгіёнах Беларусі забаронены продаж алкаголю. Абмежаванні ўводзяцца з 8.00 30 мая да 8.00 31мая і з 8.00 10 чэрвеня да 8.00 11 чэрвеня. Але забарона не поўная — можна купіць алкаголь на разліў у кавярнях, сталовых, рэстаранах.
«Пра які саюз можна гаварыць?» Лукашэнка ў Астане раскрытыкаваў Расію за навязванне утыльзбораў15
Каментары