Сабралі інфармацыю пра пяцярых мужчын, уключаных у спіс 20 мая.

Даніла Жарын

Фота: сацсеткі

Хлопцу 28 гадоў, ён родам з Магілёва. Працаваў спачатку ў краме «Белмаркет», а пасля на прадпрыемстве «Магатэкс», якое вырабляе тканіну і спецадзенне.

Згодна з матэрыяламі следства, 10 чэрвеня 2021 года ў перыяд з 3:20 да 3:35 хлопец кінуў бутэльку з запальнай сумессю ў будынак магілёўскага інстытута МУС. У выніку загарэліся дзверы будынка і іх давялося замяніць.

Яго затрымалі праз пару дзён. Падчас ператрусу ў яго кватэры знайшлі гаручую вадкасць, рыззё, маскі і вопратку, з дапамогай якіх малады чалавек здзейсніў злачынства.

Хлопца асудзілі 3 снежня 2021 года па артыкулах 289 і 130 КК (акт тэрарызму і распальванне варожасці). Яго прызналі псіхічна неадэкватным і замест турмы прысудзілі пакаранне ў выглядзе прымусовага лячэння ў стацыянары. Далейшы ягоны лёс невядомы.

Да гэтага ён ужо быў судзімы па артыкуле 339 КК (хуліганства) у 2019 годзе.

Ігар Казлоў

Фота: сацсеткі

Мужчыну 46 гадоў. Родам ён з Бабруйска. Працаваў звычайным рабочым: фрэзероўшчыкам і наладчыкам. Апошняе вядомае нам месца яго працы — Бабруйскі завод трактарных дэталяў і агрэгатаў.

Ігар жанаты. Таксама меў судзімасць за бойку яшчэ ў 2008 годзе.

Невядома, у чым сэнс ягонай справы, але бабруйчаніна абвінавачваюць па артыкулах 289 і 290 КК (акт тэрарызму і пагроза актам тэрарызму). Такім чынам, яму пагражае да 15 гадоў турмы.

Віталь Мінкевіч

Фота: сацсеткі

Хлопцу 28 год і ён таксама нарадзіўся ў Бабруйску. Увесь час ён працаваў на вытворчасці абутку, на розных прадпрыемствах.

4 кастрычніка 2020 года Віталя асудзілі на суткі за ўдзел у адным з маршаў.

Цяпер яму, як і Казлову, інкрымінаваныя артыкулы 289 і 290 КК.

Канстанцін Ермаловіч

Фота: сацсеткі

Гэтаму жыхару Бабруйска 31 год. Нарадзіўся ў Літве. Колькі год таму ў Канстанціна было ІП, якое мела ліцэнзію на паказ кінафільмаў.

Дэталі справы невядомыя. Яму, як і двум папярэднім вязням, інкрымінаваныя артыкулы 289 і 290 КК.

Андрэй Паднябенны

Фота: сацсеткі

Андрэй — грамадзянін Расіі, але з шасці год жыў у Гомелі. Цяпер яму 33 гады.

Мужчына навучаўся ў Гомельскім дзяржаўным універсітэце транспарту. Пасля перавёўся ў Харкаўскі аўтадарожны. Быў іпэшнікам і меў дазвол на рознічны гандаль таварамі. Працаваў таксама ў гандлі аўтазапчасткамі, на курсах кіравання.

Андрэй мае жонку і двух малых дзяцей.

Ён пачаў займацца актывізмам з 2019 года. Тады выступаў супраць кропкавай забудовы ў сваім раёне: збіраў подпісы пад калектыўным зваротам жыхароў супраць ушчыльнення і друкаваў улёткі. Пасля гэтага ў яго адбыўся першы ператрус, у хлопца забралі дакументы і тэхніку. Тады яго падазравалі ў падпале будаўнічага крана, але ў выніку гэта скончылася нічым.

На выбарах 2020 года Андрэй быў назіральнікам. Яго абурылі фальсіфікацыі, ён пісаў скаргі на начальніка камісіі ў пракуратуру. Хлопец удзельнічаў у акцыях пратэсту. На адной з такіх ён быў на машыне: за гэта быў аштрафаваны і пазбаўлены правоў.

Андрэй вёў здаровы лад жыцця: не курыў і не піў. Сябра распавядаў гомельскай «Вясне» пра хлопца:

«Для яго не пустыя словы — прыстойнасць, салідарнасць, падтрымка. Гэта быў яго выбар, ідэйны пратэст. Накіпела, набалела, мабыць ён не бачыў іншага выйсця, калі назіраў усю тую несправядлівасць, якая цяпер вакол нас. Сацыяльна адказны чалавек. У яго раней аніякіх праблем з законам не было, толькі штрафы за парушэнне ПДД хіба. Ён займаўся грамадскай дзейнасцю і нават пацярпеў за гэта ад сілавікоў».

Паднябеннага арыштавалі 5 лістапада 2021 года. Яго вінавацяць у «акце тэрарызму» за падпал машыны начальніка ўпраўлення Дэпартамента выканання пакаранняў і пракол шынаў у тралейбусным парку. Мужчыну пагражае да пятнаццаці гадоў пазбаўлення волі.

Чытайце таксама:

КДБ уключыў яшчэ некалькі беларусаў у спіс «тэрарыстаў»

Гэтая расіянка супраць вайны, і ёй пагражае 10 год турмы. Хто яна і што зрабіла?

«Адзін сын у спецназе служыць, другі — на танку. Ён баяўся, што іх пашлюць ваяваць». Што вядома пра затрыманых за «падрыхтоўку тэракта»

Клас
Панылы сорам
Ха-ха
Ого
Сумна
2
Абуральна
25

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру