Ціханоўская адказала крытыкам: Перамены не настануць ад таго, што мы папрызначаем адно аднаго на розныя пасады
Па завяршэнні трохдзённага візіту ў Нямеччыну дэмакратычная лідарка Святлана Ціханоўская пракаментавала для «Свабоды» папрокі і крытыку, што гучыць у яе адрас, а таксама падсумавала галоўныя вынікі візіту.
— На форуме дэмакратычных сілаў, які прайшоў тут жа, у Берліне, тыдзень таму, гучала крытыка вас і вашай каманды. Якой вам бачыцца мэта гэта форуму і ці дасягнутая яна? Як бы вы адказалі на крытыку?
— Я разумею, што ёсць людзі, не задаволеныя нашай працай, але ж у нас адна мэта. Ведаеце, я там пачула, што мы, я і офіс, робім недастаткова. Можа, і так. Але ці магчыма рабіць дастаткова? Робім што можам. І вы рабіце. Таксама пачула, што Ціханоўская, маўляў, павінна перадаць уладу. Ведаеце, мне «ўлада» не патрэбная. Мне важна дарабіць тое, што пачалі: вызваліць людзей і давесці краіну да свабодных выбараў. Ад таго, што мы папрызначаем адно аднаго на розныя пасады, перамены не настануць. Трэба цярпліва працаваць, шукаць, што аб’ядноўвае, не даваць крыўдам кіраваць намі.
— Ваш візіт у Нямеччыну быў прысвечаны не толькі мемарыяльным мерапрыемствам, гэта і палітычны візіт. Раскажыце пра яго вынікі.
— У Нямеччыне цяпер абмяркоўваюць стратэгію па Украіне, для мяне важна было дабіцца, каб за Украінай не згубілася Беларусь. Мы стаім перад пагрозай страты незалежнасці, і ў Берліне мяне пачулі. Мы дамовіліся, што ў G-7 падымуць пытанне Беларусі, будзе заява з пазіцыяй. Рыхтуемся да Генасамблеі ААН і плануем слуханні аб Беларусі «на палях». Важна, што Нямеччына не прызнае Лукашэнку прэзідэнтам, і падчас сустрэч гэта прагучала досыць выразна. Я падзякавала за падтрымку платформы для збору доказаў злачынстваў рэжыму. Спадзяваемся, што ўдасца зрушыць з месца справы ва ўніверсальнай юрысдыкцыі. Падзякавала за мабільны шпіталь, які мы перадалі беларускім медыкам ва Украіну; магчыма, будзе больш дапамогі медыкам. Мы дамовіліся, што Нямеччына зніме абмежаванні на выдачу віз у Мінску: сапраўды, Нямеччына сярод лідараў у візах. Мне не трэба было тлумачыць, што рэжым і народ — розныя рэчы. Усе вялікія СМІ пішуць пра Беларусь.
— Вы сустракаліся з Ангелай Меркель. Ці будзе сустрэча з цяперашнім канцлерам Олафам Шольцам? Наколькі ва ўмовах вайны тэма Беларусі актуальная для нямецкіх палітыкаў?
— Я сустракалася з Олафам Шольцам мінімум двойчы, але да таго, як ён афіцыйна заступіў на пасаду. У нас добрыя адносіны: з ім і яго кабінетам. 21 ліпеня я сустрэлася з кіраўніком яго адміністрацыі, мы размаўлялі паўтары гадзіны. Шмат увагі прысвяцілі палітвязням, супольным дзеянням у міжнародных арганізацыях, абмеркавалі сцэнарыі развіцця падзей у выпадку ўступлення беларускіх войскаў ва Украіну. Беларусь цяпер найперш цікавая ў кантэксце вайны з Украінай; тут разумеюць, што, калі б не Лукашэнка, магчыма, і вайны не было б. Цікава, што ўрадавая кааліцыя і апазіцыя ў нейкай ступені спаборнічаюць у пытаннях Беларусі: хто больш робіць. Вялікую справу робіць беларуская дыяспара, арганізацыя «Разам» не дае Беларусі пакінуць парадак дня.
Каментары