СК стварыў відэатэку з пратэстаў 2020-га з соцень тысяч файлаў і хоча ўзмацніць рэпрэсіі
Следчы камітэт даў справаздачу, што працягвае выяўляць і затрымліваць людзей, якія ў 2020 годзе патрабавалі свабодных выбараў і сумленнага падліку галасоў.
Як паведаміў начальнік упраўлення Следчага камітэта па Мінску Сяргей Паско, толькі за апошнія паўгода былі затрыманыя больш за 280 асоб, з якіх 238 ужо выстаўленыя абвінавачванні і яны змешчаныя пад варту.
Паско прывёў прыклад затрыманага лідара Аб'яднанай грамадзянскай партыі Мікалая Казлова. Паводле яго, Казлоў у жніўні 2020 года не толькі браў актыўны ўдзел у «масавых бясчынствах на вуліцах Мінска, але і актыўна выкарыстоўваў грамадзян Беларусі ў нізкіх мэтах сваіх куратараў». «Мікалай Казлоў кіраваў радыкальна настроеным натоўпам, даваў пратэстоўцам указанні, заклікаў блакаваць дарогі і перашкаджаць праезду тэхнікі», — заявіў начальнік упраўлення Следчага камітэта па Мінску.
«Масавымі бясчынствамі» лукашэнкаўцы называюць мірныя пратэсты.
Мікалай Казлоў быў затрыманы разам з іншымі сябрамі АГП 27 ліпеня. Яму выстаўленае абвінавачванне па народным артыкуле 342 (удзел у масавых беспарадках). Узімку Казлоў адбываў тры месяцы арышту за разгалошванне даных па крымінальнай справе супраць Каардынацыйнай рады.
Таксама Паско расказаў, што следчыя Мінска стварылі крыміналістычную відэатэку, якая ўключае сотні тысяч файлаў, дзякуючы аналізу якіх ужо вызначаныя больш за 1400 удзельнікаў пратэстаў.
Паводле яго слоў, працягваецца пастаянны збор, сістэматызацыя і вывучэнне медыйных матэрыялаў па фактах «злачынстваў экстрэмісцкай накіраванасці».
Каментары