Запасы кавы ў Бразіліі да сакавіка 2023 года знізяцца да рэкорднага мінімуму, піша Bloomberg са спасылкай на прэзідэнта бразільскага Нацыянальнага савета кавы Сайласа Бразілейра.
Адзначаецца, што з-за засухі ў найбуйнейшага вытворцы кававага бобу можа не хапіць ураджаю, каб задаволіць усё большы попыт. У выніку цэны на каву па ўсім свеце будуць расці.
Паводле прагнозу Бразілейра, запасы кавы ў краіне да сакавіка апусцяцца да 7 млн мяшкоў, тады як камфортным узроўнем аналітыкі лічаць запасы ў памеры 9-12 млн мяшкоў вагой па 60 кг кожны.
«Запасы настолькі малыя, што нават калі ў наступным годзе ў нас будзе добры ўраджай, Бразіліі наўрад ці хопіць [кавы] для задавальнення попыту. Нам проста патрэбны дождж», — заявіў агенцтву член праўлення групы экспарцёраў Cecafe Нэльсан Карвальяш.
Недахоп кававага бобу ў Бразіліі толькі пагаршае глабальны дэфіцыт кавы: запасы арабікі на партовых складах, кантраляваныя амерыканскай біржай ICE Futures, знаходзяцца на самым нізкім узроўні за 23 гады, адзначае Bloomberg.
На гэтым фоне цана ф'ючарсаў на арабіку ў Нью-Ёрку вырасла на 11% год да года, і аналітыкі чакаюць, што цэны працягнуць расці.
Пры гэтым адзначаецца, што попыт на каву не зніжаецца: спажыванне ў гэтым сезоне вырасла на 1,5% пасля росту на 2% летась.
Каментары