Рэцэпт на выхадныя. Соус рамеска ажывіць любую страву 4

Курыца з соусам рамеска. Фота: flickr.com

Каб згатаваць соус рамеска, вам спатрэбіцца:

• каля 100 мілілітраў алею, найлепш калі аліўкавага + яшчэ трохі 
• кавалкі чэрствага хлеба
• 25 грамаў міндалю, фундуку або кедравых арэхаў
• 1 чырвоны перац (пачысціце яго ад пладаножкі і насення і буйна нарэжце мякаць)
• 1 вялікімі кавалкамі нарэзаны памідор
• 1 маленькая чырвоная ці белая цыбуліна (аблупіце яе і нарэжце вялікімі кавалкамі)
• 2 зубкі часнаку (ачысціце і нарэжце таксама вялікімі кавалкамі)
• 2 сталовыя лыжкі молатай папрыкі
• каенскі (чырвоны) перац — на смак
• 1 сталовая лыжка чырвонага віннага, белага віннага ці яблычнага воцату
• соль і чорны перац

1. Выліце дзве сталовыя лыжкі аліўкавага алею на патэльню і пастаўце яе на сярэдні агонь. Кіньце туды хлеб і арэхі, трохі абсмажце іх да залаціста-карычневага колеру, перыядычна памешвайце. Перакладзіце ўсё ў блэндар ці кухонны камбайн.
2. Вярніце патэльню на агонь. Дадайце туды яшчэ дзве сталовыя лыжкі алею, нарэзаны чырвоны перац, памідор і цыбулю. Смажце гародніну 8 хвілін ці пакуль не выпарыцца лішняя вільгаць. Дадайце часнок, гатуйце яшчэ 2 хвіліны, потым дадайце папрыку і каенскі перац. Гатуйце сумесь яшчэ хвіліну, потым дадайце яе да хлеба і арэхаў у чашы кухоннага камбайна ці блэндара.
3. Уліце ў сумесь воцат і ўзбівайце яе, пакуль соус не стане аднародны. Дадайце яшчэ аліўкавага алею на смак, прыпраўце соллю і чорным перцам. Можна падаваць.

Як зварыць ідэальны курыны суп? На што варта звярнуць увагу

Рэцэпт на выхадныя. Глінтвейн

Nashaniva.com