Дырэктар Пінскага каледжа апраўдаўся за мізэрныя заробкі, якія прапануюць выпускнікам
Дырэктар Пінскага каледжа тэхнікі і тэхналогій Генадзь Палікоўскі кажа, што прапанаваны выпускнікам заробак у 250 рублёў указаны без надбавак і прэмій. А галоўны прывілей для маладых спецыялістаў — абарона ад звальнення на працягу двух гадоў, піша «Медыя-Палессе».
Днямі ў рэдакцыю «Медыя-Палесся» звярнулася пінчанка з просьбай апублікаваць варыянты прапанаваных вакансій выпускнікам каледжа. У двух з іх памер аплаты працы быў крыху большы за 250 рублёў.
Дырэктар каледжа Генадзь Палікоўскі пракаментаваў, што арганізацыі (заказчыкі кадраў) у пісьмовых запытах паказваюць толькі службовы аклад — без уліку надбавак і прэмій. Калі ідзе налічэнне поўнага заробку, тады выходзяць, нібыта, зусім іншыя сумы.
Аднак з нагоды прэмій і надбавак да зарплаты бацькам і выпускнікам нічога не растлумачылі.
Па словах Генадзя Палікоўскага, выпускнікі працуюць не толькі на пінскіх прадпрыемствах, але і ў Мінску. Напрыклад, на «Мілавіцы» былыя выпускнікі атрымліваюць зарплату каля 1700 рублёў на месяц, жывуць у інтэрнаце, за які плацяць 48 рублёў на месяц, і цалкам задаволеныя ўмовамі працы і сацпакетам.
Аднак у спісе вакансій «Мілавіцы» сёлета няма.
Як сцвярджае дырэктар каледжа, за два-пяць гадоў можна стаць канкурэнтаздольным спецыялістам на рынку працы і атрымаць важныя прафесійныя кампетэнцыі. Але галоўны прывілей, паводле яго слоў — абарона ад звальнення на працягу двух гадоў і тое, што маладому спецыялісту не могуць усталяваць выпрабавальны тэрмін і яго не могуць звольніць на аснове такой фармулёўкі, як «неадпаведнасць займанай пасадзе або выкананай працы з прычыны недастатковай кваліфікацыі».
«Кубло такое». З перапісак Кабанчука робіцца ясна, чаму Верамейчыка палічылі небяспекай і забаранілі яму ўезд ва Украіну34
Каментары
опанькі. нейкія шэрыя схемы?