Беларусы і раней выбіралі аўтобусныя туры з-за таннасці, каб праз акно паглядзець Еўропу. На фоне «закрытага неба» наземны транспарт стаў проста магчымасцю патрапіць у еўрапейскія гарады. Але сёння для гэтага трэба назапасіцца цярпеннем, больш плаціць і даўжэй чакаць, піша «Точка».
Венгрыя з іспанскай візай праз Маскву
Некаторыя турфірмы вельмі проста вырашылі для сябе праблему з візамі: прапануюць аўтобусныя туры толькі тым, у каго ёсць шэнген. Так адказалі ў адной з кампаній, у прыватнасці, наконт туру ў Венгрыю.
Яшчэ нядаўна прадстаўніца туріндустрыі расказвала, што пасольства Венгрыі праз акрэдытаванае агенцтва пад групавы тур добра адкрывала візы — ад года да трох гадоў.
Цяпер жа яшчэ ў адной турфірме адзначылі, што нават для груп у венгерскім пасольстве не пацвярджаюць запісы для падачы.
Менеджар прапанаваў аформіць дазвольны штамп праз іспанскі візавы цэнтр у Маскве пад чатырохдзённы тур Будапешт — Вена з выездам 6 мая. Тур каштуе 210 еўра ў эквіваленце.
Падаваць пашпарт для візы трэба за два-тры тыдні. Пры гэтым турыстычная кампанія не можа гарантаваць стапрацэнтны вынік. Але, як паказвае практыка, адмовы ў Маскве бываюць вельмі рэдка. Тым не менш, пры неспрыяльным зыходзе аплата турпаслугі (100 рублёў), візавай падтрымкі (200 рублёў за запіс, дапамога з дакументамі і трансфер) і 80 еўра (у гэтым выпадку) за візу не вяртаюцца.
На пытанне, ці не спыняць польскія пагранічнікі чалавека, які едзе ў Венгрыю па іспанскай візе, у турагенцтве адказалі, што «праблем звычайна з перасячэннем мяжы не ўзнікала». А наконт часу чакання спецыяліст сказаў, што папярэдні тур стаяў на мяжы каля пяці гадзін.
Францыя — Швейцарыя, Швейцарыя — Італія
Яшчэ ў адной кампаніі пацвердзілі, што, «па апошніх звестках», у адзіным на сёння пагранпераходзе ў Польшчу чаканне можа зацягнуцца ад 5 да 12 гадзін.
Тут прапанавалі аўтобусную праграму «Швейцарыя — Італія», але толькі на 25 чэрвеня (засталося шэсць месцаў) і 13 жніўня. У гэтым выпадку робіцца італьянская віза. Прычым у пасольстве яна абыдзецца ў 35 еўра, а праз VIP-залу (аказваецца, ёсць і такое) візавага цэнтра — 114 еўра. Сам тур са сняданкамі для аднаго каштуе 590 еўра, для двух-трох чалавек — 470 еўра на кожнага (без уліку даплат за экскурсіі і падатку на турызм).
Пад напрамак «Францыя — Швейцарыя» робіцца французская віза (таксама 35 еўра). Але найбліжэйшая паездка — толькі 1 жніўня. За аднамесны нумар са сняданкамі трэба заплаціць 680 еўра, двух-трохмясцовы — 530 еўра для кожнага турыста (без уліку даплат за экскурсіі і падатку на турызм).
Па словах менеджара, у абодвух пасольствах адмовы — рэдкасць. Аднак у плане доўгатэрміновасці Італія — латарэя, а вось «Францыя добрыя візы ставіць».
Рызыка турфірмаў узрастае
Прадстаўнікі турфірмаў неахвотна расказваюць аб праблемах і рызыцы, звязанай з арганізацыяй аўтобусных тураў. Толькі ўрыўкамі ад розных крыніц удалося высветліць некаторыя нюансы.
Чаканне на мяжы зараз можа расцягнуцца да 12 гадзін, а значыць змяніць праграмы, парушыць рэжым працы і адпачынку вадзіцеляў, а таксама павялічыць выдаткі на арэнду аўтобусаў.
Яшчэ адна тэма, якая застаецца ў цені: з чэрвеня краіны ЕС перастануць супрацоўнічаць з Беларуссю па «Зялёнай карце». Страхоўкі на транспарт давядзецца афармляць для кожнай краіны, у тым ліку транзітных, а гэта менш зручна і даражэй.
Таксама, мяркуючы па ўсім, турфірмы павялічылі прамежкі паміж турамі, каб скараціць прапанову і гарантаваць напаўняльнасць аўтобусаў. Гэта выклікана ў тым ліку няпростай сітуацыяй з афармленнем віз.
«Цяпер я б на гэта не пайшоў». Беларус купіў участак зямлі на Занзібары, але аказалася, што ёсць нюансы
«Па выніках апытанняў, сям'я мігрантаў траціць у сярэднім каля 1700 даляраў за месяц». Што сабой уяўляе сучасная Грузія
Беларускі турбізнэс сёлета не будзе ў стане задаволіць попыт на выязны турызм
Беларуска пераехала ў Паўднёвую Карэю. Як там жывецца?
Каментары