Польшча дамаглася вызвалення больш за 10 палітвязняў у Беларусі — прадстаўнік МЗС
Польшчы ўдалося дамагчыся вызвалення больш за 10 палітвязняў у Беларусі. Пра гэта ў эфіры Польскага радыё распавёў намеснік міністра замежных спраў Польшчы Павел Яблоньскі. Грамадскасці вядомыя чатыры прозвішчы.
Па словах Яблоньскага, дыпламатычныя метады ў адносінах з Беларуссю ненадзейныя, але Польшча ўсё ж дамагаецца некаторых поспехаў.
«Нам удалося дасягнуць мэты ў выпадку нават больш за 10 чалавек. Я не хачу казаць пра дэталі гэтых спраў, таму што кожны раз быў індывідуальны падыход. У выпадку такіх перамоў трэба быць асцярожным. Самы вялікі поспех — дамагчыся вызвалення палітвязняў. Я цяпер кажу пра палякаў, якія знаходзяцца ў беларускіх турмах, таму што гэта для нас прыярытэт, але нам трэба памятаць, што па палітычных матывах асуджана ў Беларусі больш за 1500 чалавек», — заявіў Яблоньскі.
У 2021 годзе Беларусь вызваліла трох актывістак польскай меншасці. Яны былі высланыя з Беларусі ў Польшчу. Гэта Ганна Панішава, Марыя Цішкоўская і Ірэна Бярнацкая.
У сакавіку 2022 года кіраўніка незарэгістраванага Саюза палякаў Беларусі Анжаліку Борыс вызвалілі з-пад варты і перавялі пад хатні арышт. 9 лютага на 8 гадоў калоніі асудзілі журналіста Андрэя Пачобута.
Цяпер чытаюць
Масквічка распавяла, як разам з жаніхом ледзь не загінула ў аварыі па дарозе на сваё вяселле ў сядзібе пад Лагойскам1
Масквічка распавяла, як разам з жаніхом ледзь не загінула ў аварыі па дарозе на сваё вяселле ў сядзібе пад Лагойскам
«Людзі каментавалі, што сальманела ўвайшла ў чат». Беларус паехаў працаваць у Крэмніевую даліну — і стаў кулінарным блогерам на 28 мільярдаў праглядаў55
Каментары