Некаторым затрыманым прапануюць пералічыць грошы на дабрачынны рахунак, каб пазбегнуць сутак ці выйсці з СІЗА. Што вядома пра дзіўную практыку?
Раней добраахвотна-прымусовыя ахвяраванні ў вызначаныя ўладамі арганізацыі спаганялі з тых, хто данаціў у падтрымку рэпрэсаваных. За гэта абяцалі не распачынаць крымінальнай справы. Але выглядае, што некаторым затрыманым рэжым прапануе «адкупіцца», каб закрылі ўжо заведзеную справу або зменшылі пакаранне па адміністратыўцы.
Як стала вядома «Нашай Ніве», некаторым людзям, затрыманым па палітычных матывах, прапануюць паменшыць пакаранне шляхам ахвяравання даволі буйных сум грошай у пэўныя дабрачынныя арганізацыі.
Пра такія кейсы вядома і па адміністрацыйных справах, і па крымінальных.
Тым, на каго заведзена адміністрацыйная справа, сілавікі прапануюць пералічыць грошы ў вызначаныя імі дзяржаўныя арганізацыі ці калядзяржаўныя фонды, каб чалавек мог атрымаць штраф замест сутак ці меншую колькасць сутак.
Інфармацыя пра такія выпадкі даходзіць і да праваабаронцаў. Па словах стваральніцы ініцыятывы Dissidentby Марыны Касінеравай, такія звесткі звычайна з'яўляюцца пасля чарговай хвалі масавых затрыманняў.
«Падчас такіх масавых аблаў затрымліваюць вялікую колькасць людзей, частка з якіх трапляе ў рукі сілавікоў цалкам выпадкова. Але вядома, што калі чалавека ўжо затрымалі і завялі на яго адміністрацыйную ці крымінальную справу, то проста так закрыць яе і адпусціць чалавека ў нас не могуць», — кажа Касінерава.
Па яе назіраннях, з прапановамі аплаціць «штраф» звяртаюцца да тых, што ўжо па 3—6 месяцаў знаходзіцца ў СІЗА.
Касінерава кажа, што на сваякоў затрыманых выходзяць нейкія людзі са следчых органаў, якія прапануюць, як яны кажуць, заплаціць «штраф» у абмен на вызваленне чалавека з-за кратаў.
«Калі з такімі гісторыямі да нас звяртаюцца сваякі затрыманых, то падчас размовы мы ўдакладняем, што гэта не штраф, бо ніякага рашэння суда не было. Людзям проста прапануюць перавесці грошы на пэўны рахунак, які належыць дабрачыннай арганізацыі», — кажа Касінерава.
Па яе словах, гаворка ішла пра даволі буйныя па беларускіх мерках сумы.
«З таго, што мы ведаем, то гэта былі сумы эквівалентныя 2—3 тысячам даляраў».
У выпадках з адміністрацыйнымі справамі, пра якія чула «Наша Ніва», размова вялася пра некалькі соцень рублёў.
Па назіраннях Марыны Касінеравай, з такімі прапановамі звяртаюцца ў тых выпадках, калі чалавек ужо даволі працяглы час знаходзіцца ў СІЗА, а знайсці на яго нейкую інфармацыю, за якую суд можа зачапіцца і вынесці абвінаваўчы прысуд, не атрымоўваецца.
«Гэта могуць быць людзі, якіх затрымалі за нейкія каментарыі, але яны па сваім змесце былі далёкія ад таго, каб чалавека можна было пасадзіць за краты. Таму выглядае так, што так як проста вызваліць чалавека яны не могуць, то прыдумалі такі кейс, каб можна было хоць нешта ад яго атрымаць», — мяркуе праваабаронца.
Уся працэдура трымаецца на чэсным слове, бо калі чалавека выпускаюць з СІЗА, то ён не атрымлівае ніякіх дакументаў аб тым, што справа закрытая ці нешта змянілася. Яму проста дэ-факта змяняюць меру ўтрымання.
«Важна, што чалавек, пагадзіўшыся на такую авантуру, мусіць сам прынесці квіток з пацвярджэннем аплаты сілавікам, таму ў людзей застаецца боязь, што там іх зноў могуць затрымаць і змясціць пад варту. Але з вядомых нам выпадкаў такога не было. Чалавеку, які пагадзіўся зрабіць «ахвяраванне», праз нейкі час прыходзіла інфармацыя пра тое, што справа закрытая».
Праваабаронца падкрэслівае, што такія прапановы паступаюць толькі тым затрыманым, хто ніколі раней не затрымліваўся па палітычных артыкулах.
«Такое дакладна не прапануюць актывістам, медыйным асобам ці тым, хто раней трапляў у поле зроку сілавікоў па палітычных матывах», — кажа Касінерава.
«Наша Нiва» — бастыён беларушчыны
ПАДТРЫМАЦЬЦяпер чытаюць
ЗША перадалі Лукашэнку найноўшыя амерыканскія лекі для пахудзення15
Каментары