Таргі за пусты лагер пад Мінскам ішлі 8 гадзін. Каму і за колькі прадалі
Учора з аўкцыёну зноў прадавалі лагер «Кіравец» пад Мінскам. У кастрычніку закінуты аб’ект за мільён долараў ледзь не набыла кампанія па вытворчасці мэблі, але пазней пакупнік перадумаў. Гэтым разам таргі за дзіцячы «санаторый» на Мінскім моры ішлі 8 гадзін, а за лагер змагаліся адразу 12 удзельнікаў, піша Realt.
Былы лагер «Кіравец» знаходзіцца ў лясным масіве побач з вёскай Зялёнае Ждановіцкага сельсавета. Адлегласць ад МКАД — каля 10 кіламетраў. Да пляжаў Мінскага мора — каля 2 кіламетраў.
Пабудавалі гэты дзіцячы лагер яшчэ ў 1960‑х гадах. Раней установа належала Мінскаму станкабудаўнічаму заводу імя Кірава, і тут паспела адпачыць не адно пакаленне мінчан. Лагер з піянерамі на ўездзе функцыянаваў да пачатку 2000-х, а затым быў паступова занядбаны.
Зараз на тэрыторыі ў 6,5 гектара размяшчаецца больш за дзясятак разнастайных пабудоў. У асноўным гэта жылыя карпусы (драўляныя домікі), а таксама розныя гаспадарчыя будынкі (медпункт, лазня, бібліятэка) у той ці іншай ступені захаванасці. За апошнія гады аб’ект не раз пераходзіў з рук у рукі, але так і не дачакаўся рэканструкцыі.
У выніку пусты лагер вырашылі адправіць на аўкцыён. Аб’ект агульнай плошчай каля 1200 квадратаў выставілі на электронныя таргі за 44 тысячы рублёў (каля 15 тысяч долараў). Чарговы аўкцыён прайшоў учора (24 снежня) і працягнуўся цэлых 8 гадзін. За гэты час пачатковы кошт дзіцячага лагера вырас амаль у 60 разоў.
У электронных таргах удзельнічала 12 пакупнікоў, якія паднялі кошт аб’екта да 2,6 мільёна рублёў (каля 900 тысяч долараў).
Пераможцам аўкцыёну і новым уласнікам закінутага лагера стала юрыдычная асоба, якая займаецца рознічным гандлем харчовымі прадуктамі.
Новы ўласнік абавязаны забяспечыць бяспеку і абмежаванне доступу на аб’ект, падтрымліваць належны санітарна-тэхнічны стан тэрыторыі, правесці рэканструкцыю або знесці старыя пабудовы, увесці новы аб’ект у эксплуатацыю і выкарыстоўваць яго па прызначэнні, вызначаным выканкамам Мінскага раёна. Разам з будынкамі новаму ўладальніку дастаўся ўчастак у 7 гектараў.
Каментары