У Эстоніі хочуць пазбавіць беларусаў права галасаваць на мясцовых выбарах, але каб без змены Канстытуцыі
Партнёры па ўрадавай кааліцыі ў Эстоніі дамовіліся распрацаваць прававую аснову для таго, каб прыпыніць правы пастаянных жыхароў гэтай краіны, што з'яўляюцца грамадзянамі Расіі і Беларусі, галасаваць на мясцовых выбарах. Праўда, пры гэтым хочуць абысціся без унясення змен у Канстытуцыю, піша EER.
Тлумачачы неабходнасць абмежаваць частку жыхароў Эстоніі ў правах, кааліцыйныя палітыкі спасылаюцца на пагрозу бяспецы. Аднак многія эксперты назвалі гэта небяспечным прэцэдэнтам, які супярэчыць Асноўнаму закону краіны.
Меркаванні юрыстаў па гэтым пытанні падзяліліся. Міністр юстыцыі Эстоніі Кале Лаанэт адзначыў з гэтай нагоды: «Мы пастараемся глыбей прааналізаваць гэтыя меркаванні, каб дакладней зразумець, ці можам мы абмежаваць выбарчае права ў гэтым выпадку без неабходнасці мяняць Асноўны закон. Сёння мэта ўрадавай кааліцыі — знайсці такія рашэнні, якія не запатрабуюць змены Канстытуцыі».
Паводле міністра, змена Канстытуцыі — вельмі сур'ёзная справа і гэта «надзвычайны крок», таму рабіць гэта надта не хацелася б. У той жа час ён упэўнены, што ключавая праблема ў гэтым выпадку ўтрымліваецца ва ўстанаўленні паняцця «пастаянны жыхар» і выказаў упэўненасць, што рашэнне знойдзецца ў найбліжэйшыя месяцы.
Каментары
З іншага боку, а чаго чакаць ад краіны, дзе каля траціны жыхароў маюць пашпарт не грамадзяніна.
А потым яны ж будуць здзіўляцца, чаму этнічныя рускія (а гэта каля 1/3 насельніцтва) не любяць мясцовую ўладу і сімпатызуюць Путлеру.