У Вільні турысты захацелі зрабіць фота — ахова чыгуначнага вакзала забрала тэлефон і загадала ўсё сцерці
Улетку ў Вільню прыязджаюць шмат турыстаў, але не заўсёды горад прымае іх прыязна. Так, калі госць літоўскай сталіцы захацеў зрабіць на памяць фота сваёй маці на фоне будынка чыгуначнага вакзала, да яго падышлі ахоўнікі і не толькі загадалі сцерці фатаграфіі, але і вырвалі ў яго з рук тэлефон, як піша madeinvilnius.lt.
Прадстаўнікі «Літоўскай чыгункі» сказалі, што рабіць фота на вакзале без спецыяльнага дазволу забараняецца. Таму ахоўнік і запатрабаваў сцерці здымкі. Чыгунка — аб'ект стратэгічнага значэння, як сказала прадстаўніца кампаніі Габ'ёта Алузайце.
Турыст у паліцыю не звяртаўся, аднак прадстаўніца паліцыі пракаментавала гэтую сітуацыю журналістам. Па словах прэс-сакратаркі Галоўнага камісарыята паліцыі Віленскай акругі Юліі Самаракоўскай, калі ахоўнік меркаваў, што турыст зрабіў нешта супрацьзаконнае, ён павінен быў праінфармаваць паліцыю.
Паводле яе слоў, у самога ахоўніка няма права забіраць тэлефон. Гэта пацвердзіла і прадстаўніца «ЛЧ». «У ахоўніка не было права на тое, каб забіраць тэлефон, але на вакзале і побач з ім нельга фатаграфаваць без спецыяльнага дазволу, пра гэта сведчаць інфармацыйныя знакі. Калі ахоўнік зафіксаваў парушэнне, ён павінен быў папрасіць сцерці фатаграфіі, а калі грамадзянін не пагодзіцца — выклікаць паліцыю», — сказала Алузайце.
Пра інцыдэнт праінфармавалі ахоўную кампанію, якая нагадае сваім работнікам іх правы і абавязкі. Жыхары і турысты павінны памятаць, што ў Літве ў некаторых месцах рабіць фатаграфіі і відэа забараняецца, бо гэтыя аб'екты ўключаныя ў спісы аб'ектаў стратэгічнага значэння.
Каментары