Генпракуратура адмовілася адказаць, колькі беларусаў звярнуліся ў камісію па вяртанні
Генпракуратура Беларусі адмовілася раскрыць актуальныя звесткі аб выніках працы камісіі па вяртанні беларусаў, якія з'ехалі з краіны, паведаміла расійскае выданне РБК.
Гэта вынікае з адказу беларускай Генпракуратуры на запыт РБК аб тым, колькі зваротаў паступіла ў камісію пасля яе зʼяўлення, колькі чалавек ужо вярнуліся ў рамках такога механізму і могуць вярнуцца, не баючыся пераследу, а таксама колькі крымінальных спраў было спынена ў гэтым кантэксце.
«Запытаная вамі інфармацыя адносіцца да катэгорыі, распаўсюджванне якой у сродках масавай інфармацыі, на інтэрнэт-рэсурсах абмежавана. Улічваючы пададзенае вышэй, накіраваць у ваш адрас запытаныя звесткі не ўяўляецца магчымым», — гаворыцца ў адказе кіраўніка ўпраўлення Генпракуратуры Беларусі па працы са СМІ Анжалікі Курчак.
Чыноўніца таксама адзначыла, што «агульнадаступная інфармацыя аб дзейнасці камісіі рэгулярна публікуецца на афіцыйных інтэрнэт-рэсурсах» ведамства.
28 красавіка Генпракуратура паведаміла аб першым пасяджэнні камісіі па разглядзе зваротаў беларусаў, якія знаходзяцца за мяжой, у пытаннях учынення імі правапарушэнняў. У ведамстве заявілі, што ў камісію паступіла больш за 60 зваротаў ад тых, хто, ратуючыся ад рэпрэсій, мусіў пакінуць Беларусь.
17 ліпеня «Кіберпартызаны» расказалі, што, паводле іх даных, за пяць месяцаў працы камісіі ў яе звярнуліся ўсяго 16 чалавек. З іх ухвалілі толькі дзве заяўкі — маці Рамана Пратасевіча Наталлі і Філіпа Давыдава, якія пасля вяртання на радзіму далі інтэрвʼю прапагандыстам.
Цяпер чытаюць
Беларусы сустракаюць вызваленых палітвязняў у Вільні ФОТЫ і ВІДЭА4
Каментары