Ілья Дабратвор вырашыў пакуль не вяртацца ў Беларусь і прывёў прыклад Васіля Быкава
Грамадскі актывіст і ў мінулым супрацоўнік прарасійскага рэсурсу «Політрінг» Ілья Дабратвор, які ўжо некалькі гадоў таму з'ехаў у Польшчу, паўтара тыдня таму ўсіх здзівіў заявай, што збіраецца вярнуцца ў Беларусь пад гарантыі Юрыя Васкрасенскага. Выезд меў адбыцца ў мінулы панядзелак, але да сёння так і не было вядома, наважыўся Дабратвор на гэта ці не. Цяпер сітуацыя праяснілася.
Сёння на старонцы колішняга актывіста ў фэйсбуку з'явіўся «Пост пра вяртанне», з якога стала зразумела, што ягоныя планы змяніліся. Перш чым перайсці да сутнасці справы, Дабратвор даў разгорнутае тлумачэнне таго, што такое, на ягоную думку, «цяжка»:
«Цяжка сапраўднаму патрыёту сваёй краіны знаходзіцца за яе межамі.
Цяжка, калі на радзіме было ўсё, а тут нічога.
Цяжка ў 40+ гадоў пачынаць усё з нуля.
Цяжка чытаць каментары / словы людзей, якія нібыта пазіцыянуюць сябе прыхільнікамі дэмакратыі, але на самай справе імі не з'яўляюцца.
Цяжка быць на волі, калі найлепшыя людзі краіны і твае сябры ў турме.
Цяжка разумець, што адна дыктатура ані не лепшая за іншую.
Цяжка шмат гадоў верыць у людзей, дапамагаць ім і страціць гэтую веру.
Цяжка страчваць любімых людзей, нават калі ў фізічным сэнсе яны жывыя.
Цяжка прыняць сітуацыю адзіноты, прыняць, што зараз ты да канца жыцця будзеш адзін.
Цяжка быць «відам, які вымірае», як на Усходзе, так і на Захадзе.
Цяжка і балюча чытаць і глядзець любую прапаганду.
Цяжка прыняць, што ўсё сваё свядомае жыццё ты проста п..ў.
Цяжка прыняць, што родныя людзі, якія памерлі, мелі рацыю, але ты іх не слухаў і спрачаўся з імі.
Цяжка быць адданым.
Цяжка, але трэба».
Пасля таго Ілья Дабратвор выклаў, дзе ён цяпер знаходзіцца і што, уласна кажучы, са справай ягонага вяртання.
Паводле Дабратвора, ён вельмі хацеў бы вярнуцца ў Беларусь, але, «мабыць, не цяпер. А можа, ужо ніколі».
Актывіст сцвярджае, што ад пачатку не верыў у дадзеныя яму гарантыі, але яму было цікава, у які момант папярэднія абяцанні пачнуць мяняцца. І нібыта так зрабілася пасля паста, у якім ён заявіў пра намер вярнуцца ў панядзелак.
Маўляў, прашэнне ў камісію па вяртанні, якое ён нібыта не павінен быў падаваць, цяпер ужо стала абавязковым.
А таксама
«нечакана з'явілася забарона на выезд з ЕС і проста ўзмоцненая ўвага паліцыі і спецслужбаў да маёй сціплай персоны (хоць раней такога не было)».
У канцы паста Дабратвор даў адказ каментатарам, якія яго крытыкавалі:
«Я проста прывяду прыклад Васіля Быкава, які знаходзіўся ў свой час у вымушанай эміграцыі. Вельмі раю пачытаць пра гэты перыяд. Вядома, усё будзе добра, толькі незразумела ў каго і калі».
Чытайце таксама:
Чаму беларусы едуць на Радзіму, калі гэта для іх можа быць небяспечна
Мужчыну, які вярнуўся з Польшчы, будуць судзіць па чатырох крымінальных артыкулах
Кіберпартызаны распавялі, колькі чалавек звярнуліся ў камісію па вяртанні
«Адмываў гаўно з унітазаў, мы там як самыя кончаныя». Блогер Вадзім Vadimati Ермашук — пра тое, як жыў у калоніі ў «нізкім статусе»25
Каментары