Продаж кватэр у абласных цэнтрах вырас на 4%, паведамляе Office Life са спасылкай на Дзяржкаммаёмасць.
У цэлым за трэці квартал у беларускіх абласных цэнтрах прададзена 3049 кватэр. Гэта на 2% больш, чым у другім квартале, і на 4% пераўзыходзіць значэнне аналагічнага перыяду 2022 года.
Лідар па колькасці прададзеных кватэр — Гродна, дзе было закрыта 795 здзелак. Менш за ўсё іх у Магілёве: там прадалі 428 кватэр.
Доля кватэр, набытых на першасным рынку абласных цэнтраў, вагаецца ад 1 да 13% у такіх гарадах, як Брэст, Віцебск, Гомель, Магілёў, і да 39% — у Гродне.
Розніцца ў асобных абласных цэнтрах попыт на кватэры па колькасці пакояў. Напрыклад, у Віцебску і Магілёве куплялі больш аднапакаёвых кватэр, а ў Брэсце, Гомелі і Гродне — двухпакаёвых.
Сярэдняя цана квадратнага метра ў далярах за трэці квартал павялічылася ў Брэсце, Гомелі і Магілёве на 2%, у Віцебску — на 3%, у Гродне не змянілася.
За год сярэдні кошт «квадрата» ва ўсіх абласных цэнтрах, за выключэннем Гродна, у далярах вырас: ад 3% у Магілёве да 11% у Брэсце. У Гродне зафіксавана зніжэнне ў межах 1,5%.
Найбольш дарагая здзелка з кватэрай у трэцім квартале сярод абласных цэнтраў зарэгістраваная ў Брэсце. Чатырохпакаёвую кватэру па вул. Інтэрнацыянальнай прадалі за 218,8 тыс. даляраў. Пры гэтым кошт іншых прададзеных кватэр не перавышаў 180 тыс. даляраў.
А найбольш высокі кошт квадратнага метра ў трэцім квартале сярод абласных цэнтраў зафіксаваны ў Віцебску. Тут «квадрат» у трохпакаёвай кватэры па вул. Крылова абышоўся пакупніку ў 2,6 тыс. даляраў.
Чытайце таксама:
У Слуцку ў маі здалі шматпавярховік, у якім немагчыма жыць. На доме — вельмі трапны мурал
У цэнтры Мінска прадаецца закінуты будынак. Каштуе як трохпакаёвая кватэра
«Уся мэбля была пасечана сякерай». Рыэлтары распавялі пра незвычайныя гісторыі з практыкі
Каментары