EPAM скараціў глабальную каманду на 10%. Рэлакейт амаль замарожаны
Штат EPAM у свеце скараціўся на пяць тысяч спецыялістаў, рэлакейт-праграмы амаль згорнутыя — выдаткі на іх упалі ў 40 разоў у параўнанні з мінулым годам. Пра гэта гаворыцца ў фінансавай справаздачнасці кампаніі за трэці квартал, піша Dev.by.
Выручка
За ліпень-верасень EPAM атрымаў 1,15 мільярда даляраў выручкі — прыкладна столькі, колькі і планавалася. Але гэта мінімальная квартальная выручка сёлета. Акрамя таго, яна меншая, чым у трэцім квартале летась.
EPAM скарачае выручку ўжо два кварталы запар, пры гэтым расце тэмп падзення як у грошах, так і працэнтах.
Калі ў другім квартале выручка знізілася адносна такога ж квартала 2022 года на 25 мільёнаў даляраў, або на 2%, то ў трэцім квартале — ужо на 75 мільёнаў даляраў, або на 6%.
Выручка EPAM у 2022—2023 гадах
У выніку за дзевяць месяцаў выручка EPAM упала ў параўнанні з такім жа перыядам мінулага года больш чым на 1,5% або на 60 мільёнаў даляраў і склала 3,53 мільярда даляраў.
Улічваючы ў тым ліку сітуацыю на рынку кампанія чакае атрымаць па выніках усяго 2023 года 4,66-4,67 мільярда даляраў выручкі. Гэта на 3% або на 160-170 мільёнаў даляраў менш, чым па выніках мінулага года, які стаў для кампаніі рэкордным па памеры атрыманай выручкі.
Чысты прыбытак
У трэцім квартале ўпаў і чысты прыбытак кампаніі. Калі ў ліпені-верасні мінулага года кампанія атрымала 156 мільёнаў даляраў чыстага прыбытку, то цяпер за гэты ж перыяд — 97 мільёнаў даляраў ці амаль на 40% менш.
Мяркуючы па справаздачнасці, на чыстым прыбытку адмоўна адбілася зніжэнне даходу кампаніі ад аперацыйнай дзейнасці. За трэці квартал даход склаў 114 мільёнаў даляраў — на 36% менш, чым у трэцім квартале 2022 года. Як сказана ў справаздачнасці, аперацыйныя даходы ўпалі з-за страт ад продажу пакінутых актываў у Расіі ў памеры 25,9 мільёна даляраў.
У пачатку жніўня стала вядома, што EPAM прадаў расійскую юрасобу ТАА «Эпам Сістэмз» расійскай групе «Рэксофт». Сума ўгоды не агучвалася.
Усяго за дзевяць месяцаў EPAM атрымаў 319,5 мільёна даляраў чыстага прыбытку — на 21% больш, чым за такі ж перыяд мінулага года.
Выдаткі на рэлакейт
Паводле інфармацыі супрацоўнікаў EPAM, у кампаніі сёлета рэлакейт фактычна замарожаны. Гэта адлюстроўваецца і ў фінансавай справаздачнасці. За дзевяць месяцаў кампанія выдаткавала на рэлакацыю ўсяго каля 900 тысяч даляраў. За такі ж перыяд мінулага года выдаткі былі ў 40 разоў большыя — 37,5 мільёна даляраў.
Глабальны штат
На мінулым тыдні EPAM паведаміў супрацоўнікам беларускага офіса аб скарачэнні 2% каманды. Паводле нашай інфармацыі гэта не першае звальненне спецыялістаў у Беларусі за апошнія месяцы. Акрамя таго кампанія скарачае персанал і ў іншых лакацыях, што відаць у тым ліку і па справаздачнасці.
Па даных кампаніі, на канец верасня ва ўсіх лакацыях EPAM працавала 54,6 тысячы спецыялістаў. За трэці квартал глабальны штат скараціўся амаль на 2%, а з пачатку гэтага года амаль на 10% або на 5 тысяч спецыялістаў (на канец 2022 года ў кампаніі працавала 59,3 тысячы чалавек).
Штат супрацоўнікаў EPAM ва ўсіх лакацыях у свеце (тысяч чалавек)
Працягвае скарачацца і штат вытворчых спецыялістаў у EPAM. На канец верасня іх было 48,5 тысячы ва ўсіх лакацыях (52,9 тысячы — на канец 2022 года).
«Яна не ў турме, а на спецдачы КДБ!» Канспіролагі накінуліся на Калеснікаву12
Каментары