Украінскія тэлеграм-каналы апублікавалі ВІДЭА з месца ліквідацыі Ківы
Украінскія тэлеграм-каналы са спасылкай на крыніцы ў СБУ публікуюць фота і відэа з месца забойства былога дэпутата Вярхоўнай Рады Іллі Ківы. На кадрах бачная зброя, з якой быў застрэлены Ківа, а таксама назіральны пункт, з якога агенты СБУ сачылі за экс-нардэпам.
Таксама апублікавана фота, як сцвярджаецца, цела забітага.
Спецаперацыя СБУ рыхтавалася доўгі час і была паспяхова рэалізавана службай, піша Инсайдер UA. На кадрах відаць, як цела Ківы ляжыць на снезе, а каля яго — плямы крыві.
Асобна на відэа відаць назіральны пункт, адкуль сачылі за Ківам. «Менавіта недалёка ад гэтага месца Ківа часта здымаў свае шматлікія антыўкраінскія відэа», — дадае Инсайдер UA.
Паводле крыніц выдання, Ківа быў адной з прыярытэтных мэтаў, яго «вялі» даўно, вывучалі да дэталяў маршруты перамяшчэння, распарадак дня і звычкі. Нягледзячы на сур'ёзную ахову, СБУ ліквідавала яго пад Масквой.
«Гэта сігнал усім здраднікам і ваенным злачынцам, якія перайшлі на бок ворага. Памятайце, Расія вас не абароніць. Як адзначаў раней кіраўнік СБУ Васіль Малюк, смерць — гэта адзіная перспектыва, якая чакае ворагаў Украіны», — дадае крыніца.
Цела былога ўкраінскага дэпутата знайшлі 6 снежня на тэрыторыі паркавай зоны гатэля «Величъ Country Club» у падмаскоўнай вёсцы Супанева.
Каментары