Вось што важна для захавання здароўя вашых зубоў

Вядома, што ад здароўя зубоў залежыць агульнае здароўе чалавека. Даследаванні паказваюць, што наяўнасць парадантыту ўплывае на развіццё такіх захворванняў, як дыябет, хваробы сэрца, рэспіраторныя інфекцыі і дэменцыя.

Так, падчас кавіду навукоўцы выявілі, што вірус гэтай хваробы пранікаў у арганізм у абыход дыхальных шляхоў праз хворыя дзясны.

Вядома, што салодкае дрэнна ўплывае на зубы. Але спецыялісты звяртаюць увагу, што тут важнейшая не колькасць цукру, а частата ўжывання салодкага. Калі вы збіраецеся зʼесці што-небудзь салодкае, зʼешце ўсё адразу — на працягу 5-10 хвілін. Лепш адразу зʼесці цэлую шакаладку, чым падзяліць яе на некалькі частак і есці на працягу дня.

Спецыялісты медыцынскага цэнтра Рочэстэрскага ўніверсітэта (ЗША) рэкамендуюць ужываць салодкае падчас асноўнага прыёму ежы, калі выдзяляецца больш сліны, якая служыць буферам, што абараняе вашыя зубы ад цукру і кіслаты. 

Але не толькі салодкае шкодна. Такі ж негатыўны эфект аказвае празмернае ўжыванне натуральных сокаў з цытрусавых, а таксама газаваных безалкагольных напояў. Навукоўцы высветлілі, што кіслата ў апельсінавым соку аказвае негатыўнае ўздзеянне на зубную эмаль, прыкметна памяншаючы яе цвёрдасць.

Калі вы не гатовыя адмовіцца ад соку з цытрусавых, то піце яго праз саломінку. Тык вы мінімізуеце яго негатыўнае ўздзеянне на эмаль зубоў. Для большай упэўненасці прапалашчыце рот вадой пасля таго, як скончыце піць.

Лекары ні ў якім разе не рэкамендуюць чысціць зубы адразу пасля ўжывання соку з цытрусавых ці газаваных і энергетычных напояў. Такія напоі акрамя вялікай колькасці цукру ўтрымліваюць фосфарную і лімонную кіслоты, якія негатыўна ўплываюць на эмаль зубоў. Разумна пасля іх ужывання вытрымаць паўзу ў паўгадзіны.

Знізіць рызыку разбурэння зубоў з-за прадуктаў, якія вы ўжываеце, дапаможа таксама абмежаванне колькасці перакусаў. А для саміх перакусаў выбірайце што-небудзь пажыўнае. Напрыклад, садавіну і гародніну, багатыя клятчаткай (морква, агурок, яблык, персік), сыр, малако, просты ёгурт.

Павялічыць

Гародніна і садавіна спрыяюць натуральнаму ачышчэнню паверхні зубоў ад налёту. А кальцый і фасфаты ў малацэ, сыры і іншых малочных прадуктах дапамагаюць аднавіць зубную эмаль і колькасць мінералаў, якія вашыя зубы маглі страціць з-за іншых прадуктаў. 

Умацаванню зубоў і ўзмацненню агульнага імунітэту арганізму дапамагаюць вітаміны і клятчатка, якія змяшчаюцца ў зеляніне (кроп, пятрушка, сельдэрэй, шпінат).

Станоўчы эфект мае ўжыванне вады. Асабліва ўзбагачанай фторам. Дарэчы, фторам (а таксама кальцыем) багатыя грэцкія арэхі і міндаль. Апошні таксама вядомы абязбольваючым дзеяннем.

Прадухіленню карыесу дапаможа таксама чай. Як зялёны, так і чорны, ён змяшчае поліфенолы, якія забіваюць бактэрыі.

А пасля перакусу рэкамендуецца пакласці ў рот жавальную гумку без цукру, каб павялічыць выдзяленне сліны, якая дапаможа вымыць ежу і кіслату.

Ну а найлепшы спосаб падтрымліваць добрае здароўе зубоў — прытрымлівацца класічных парадаў па доглядзе за зубамі, уключаючы чыстку зубоў два разы на дзень і выкарыстанне зубной ніткі кожны дзень.

Чытайце яшчэ:

Стаматолаг з Капыля запярэчыў чыноўнікам: Зніжаць цэны — мы пацерпім страту

Навукоўцы хочуць лекаваць карыес з дапамогай ствалавых клетак

«Патраціў 8 тысяч даляраў на зубы». У колькі беларусам абыходзяцца стаматалагічныя паслугі?

• 19
• 0
• 1
• 5
• 1
• 0
• 2
• 0