Серыя складаецца з 15 марак з выявамі ўдзельніц групы і іх самымі запамінальнымі выступамі мінулых гадоў.
Брытанская паштовая кампанія Royal Mail выпускае тэматычную калекцыю марак, прысвечаную жаночаму поп-гурту Spice Girls, які стаў часткай сусветнай поп-культуры 90-х. Сёлета калектыў адзначае сваё 30-годдзе, паведамляе Бі-бі-сі.
Серыя складаецца з 15 марак з выявамі ўдзельніц групы і іх самых вядомых выступаў мінулых гадоў. У іх ліку ўручэнне ўзнагарод Brit Awards у 1997 годзе і цырымонія закрыцця лонданскіх Алімпійскіх гульняў 2012 года.
Royal Mail рэгулярна выпускае камплекты марак з нагоды памятных падзей або ў гонар знакамітых людзей і персанажаў: ад Дэвіда Боўі і медзведзяняці Падынгтана да лонданскай Алімпіяды і серыялу «Гульня тронаў».
На навіны пра тое, што ў гэтым годзе гэтага гонару ўдастоіліся Spice Girls, самі ўдзельніцы групы адрэагавалі сваім знакамітым слоганам: «гэта Girl Power (жаночая сіла)!» Яны дадалі, што і марыць пра такое не маглі, калі толькі сабраліся разам.
Гурт Spice Girls стаў сусветнай сенсацыяй дзякуючы дэбютнаму сінглу Wannabe 1996 года, за якім неўзабаве з'явіўся альбом Spice. Гэтая кружэлка стала самым прадаваным альбомам жаночага гурта ў гісторыі музыкі, а іх слоган «Girl Power» — папулярным сімвалам фемінізму.
Пасля, прадаўшы больш за 100 мільёнаў копій усіх сваіх альбомаў па ўсім свеце, Spice Girls сталі ў цэлым самай паспяховай жаночай групай у свеце.
Spice Girls з'явіліся на свет у сярэдзіне 1990-х у выніку праслухоўванняў, арганізаваных сям'ёй музычных прадзюсараў. Тыя хацелі стварыць жаночую альтэрнатыву папулярным у той час бой-бэндам, такім як Take That і East 17, прычым кожная з удзельніц, па іх задумцы, павінна была ўвасабляць пэўную якасць. Так з'явіліся псеўданімы «Рудая», «Спартыўная», «Шыкоўная», «Строгая» і «Бэбі».
Джэры Халіўэл, Мелані Чысхолм, Вікторыя Адамс (цяпер Бэкхэм), Мелані Браун і Эма Бантан былі адабраны з прыкладна 400 канкурсантак.
Але стаўшы калектывам, яны хутка расчараваліся ў сваіх стваральніках, знайшлі новых менеджараў і падпісалі кантракт з гуказапісвальным гігантам Virgin Records, з чаго і пачаўся іх шлях да славы.
Агулам яны запісалі дзевяць хітоў, якія трапілі на першае месца брытанскіх чартаў. У іх ліку Say You'll Be There, 2 Become 1, Who Do You Think You Are, Spice Up Your Life і Viva Forever.
Яны прыпынілі сваю працу ў 2020 годзе, але з тых часоў уз'ядналіся некалькі разоў дзеля канцэртаў.
Spice Girls сталі толькі шостым музычным гуртом, якім Royal Mail прысвяціла серыю марак. Да іх былі The Beatles у 2007 годзе, Pink Floyd у 2016 годзе, Queen у 2020 годзе, The Rolling Stones у 2022 годзе і Iron Maiden у 2023 годзе.
«З таго часу, як група сфармавалася ў 1994 годзе, Spice Girls былі сілай, з якой немагчыма не лічыцца. Мы з гонарам шануем самую паспяховую жаночую музычную групу з усіх, што мы ведаем, і не толькі з-за яе музыкі, але і з-за ўплыву на многія аспекты нашага жыцця», — заявіў прадстаўнік Royal Mail Дэвід Голд.
Маркі паступяць у шырокі продаж 11 студзеня.
У Беларускай праваслаўнай царкве абнавілі цэннік? Вось якія будуць рэкамендаваныя тарыфы7
Каментары