У Кітаі цяпер назіраецца дэфляцыя паводле сцэнарыя Японіі і высокі ўзровень беспрацоўя сярод моладзі, што сведчыць пра пачатак эпохі «застою і расчаравання», лічыць амерыканскі эканаміст, лаўрэат Нобелеўскай прэміі па эканоміцы 2008 года Пол Кругман. Ягоныя словы прыводзіць The New York Times.
Паводле слоў Кругмана, шэраг аналітыкаў чакаў, што ў Кітаі будзе эканамічны бум пасля адмены каранавірусных абмежаванняў, аднак замест гэтага краіна адстала практычна па ўсіх паказчыках, акрамя ВУП, які, папярэдне, вырас на 5,2%.
«Але з нагоды гэтай лічбы шырока распаўсюджаны скептыцызм. Дэмакратычныя краіны, такія як Злучаныя Штаты, рэдка палітызуюць сваю эканамічную статыстыку — хаця спытайце мяне пра гэта яшчэ раз, калі да ўлады вернецца Дональд Трамп, — але аўтарытарныя рэжымы часта гэта робяць», — заявіў Кругман.
Эканаміст са спасылкай на афіцыйную статыстыку Кітая сцвярджае, што ў краіне зафіксаваная дэфляцыя паводле сцэнарыя Японіі 1980-х гадоў і высокі ўзровень беспрацоўя сярод моладзі.
«Гэта не паўнамаштабны крызіс, прынамсі пакуль, але ёсць падставы меркаваць, што Кітай уступае ў эпоху застою і расчаравання», — заявіў нобелеўскі лаўрэат.
Сярод прычын сітуацыі, якая склалася, Кругман назваў падаўленне прыватнай ініцыятывы, «фінансавыя рэпрэсіі» (выплата нізкіх працэнтаў па ашчаджаннях і выдача танных крэдытаў прывілеяваным пазычальнікам), а таксама слабую сістэму сацыяльнай абароны, якая змушае сем'і збіраць грошы на выпадак магчымых надзвычайных сітуацый.
«Высокія тэмпы інвестыцый могуць быць эфектыўнымі, калі ў вас хуткі рост працоўнай сілы і прадукцыйнасці, як у Кітаі ў пачатку 2000-х. Але колькасць працаздольнага насельніцтва Кітая дасягнула піку прыкладна ў 2010 годзе і з тых часоў працягвае скарачацца. Хоць краіна дэманстравала ўражлівы тэхналагічны патэнцыял у некаторых галінах, яе агульная прадукцыйнасць таксама, падобна, стагнуе», — сцвярджае эканаміст.
Кругман лічыць, што Кітаю неабходна пераарыентаваць большую частку даходаў на хатнія гаспадаркі, а таксама ўмацаваць сістэму сацыяльнай абароны, што дазволіць скараціць інвестыцыйныя выдаткі.
Таксама эканаміст выказаў занепакоенасць адносна таго, што Кітай можа распачаць спробу падтрымкі эканомікі шляхам нарошчвання экспарту, што стане праблемай для прасоўвання Захадам зялёных тэхналогій. «І самае страшнае: ці не паспрабуе Кітай адцягнуць увагу ад унутраных цяжкасцяў, заняўшыся ваенным авантурызмам?» — задаецца пытаннем нобелеўскі лаўрэат.
«Так што давайце не будзем злараднічаць з нагоды эканамічнага спаду ў Кітаі, які можа стаць праблемай для ўсіх», — рэзюмаваў Кругман.
Чытайце таксама:
«Састарэлая тэхналогія». Кітай прызнаў неэфектыўнымі гіпергукавыя «цуда-ракеты» Пуціна
Скрыня Пандоры. Як Тайвань можа зладзіць апакаліпсіс у Кітаі?
Цяпер чытаюць
Віталь з-пад Вілейкі, які падпаліў хату з уласнымі дзецьмі, завербаваўся ў расійскае войска. І прапаў на першым жа баявым заданні9
Каментары